TJM aıazǵa baılanysty órt qaýipsizdigin saqtaýǵa shaqyrady

ASTANA. KAZINFORM — Qazgıdromettiń málimetinshe, elimizdiń aýmaǵynda temperatýranyń kúrt tómendeýi kútiledi. Osyǵan baılanysty Tótenshe jaǵdaılar mınıstrligi azamattardy turǵyn úı-jaılardy jylytý kezinde órt qaýipsizdigi sharalaryn qatań saqtaýǵa shaqyrady.

Vedomstvo málimetinshe, birinshi kezekte peshpen jylytýdyń, elektr jáne gaz jylytqyshtarynyń jaramdylyǵyn tekserý qajet.

Sonymen qatar:

— tek jaramdy qurylǵylardy qoldanyńyz;

— jabdyqtyń qyzyp ketýine jol bermeńiz jáne toqqa qosylǵan aspaptardy qaraýsyz qaldyrmańyz;

— janǵysh materıaldarǵa deıingi qaýipsiz araqashyqtyqty saqtańyz;

— qoldan jasalǵan nemese aqaýy bar jylytqyshtardy paıdalanýdan bas tartyńyz;

— murjalardyń jaramdylyǵyn qamtamasyz etip, qajet bolǵan jaǵdaıda olardy tazalańyz.

TJM jylytý aspaptaryn durys paıdalaný órttiń aldyn alýdyń jáne sýyq mezgilde azamattardyń qaýipsizdigin qamtamasyz etýdiń mańyzdy sharty ekenin atap ótti.

Aıta keteıik, aldaǵy kúnderi elimizde -40°S-qa deıin aıaz bolady.

Budan buryn SQO-da qatty aıazǵa baılanysty jedel shtab jumys istep jatqanyn jazǵan edik.