TJM avıatsııalyq parki kez kelgen aýmaqqa qona alatyn ushaqpen tolyqty

ASTANA. KAZINFORM — Shymkent halyqaralyq áýejaıynda jańa L-410 kóp maqsatty áýe kemesin qabyldaý rásimi ótti. Bul ushaq Ónerkásipti damytý qorynyń qarjylaı qoldaýymen satyp alyndy. Jańa tehnıka Tótenshe jaǵdaılar mınıstrliginiń jańartylyp jatqan avıatsııalyq parkindegi úshinshi ushaq. Bul týraly vedomstvonyń baspasóz qyzmeti habarlady. 

Jańa áýe tehnıkasynyń Shymkentke jetkizilýi — mańyzdy ınfraqurylymdyq jáne ónerkásiptik nysandar shoǵyrlanǵan iri strategııalyq ortalyq úshin erekshe mańyzǵa ıe.

«Qazavıaqutqarý» AQ bas dırektory Alpamys Kamalov avıatsııalyq parktiń jańartylýy qutqarý bólimsheleriniń múmkindikterin arttyrýǵa, áreket etý ýaqytyn qysqartýǵa jáne ońtústik óńirdiń jedel qyzmetteriniń mobıldigin kúsheıtýge baǵyttalǵan mańyzdy qadam ekenin atap ótti. 

— Jańa L-410 ushaǵy 19 jolaýshy nemese 1800 kelige deıin júk tasymaldaýǵa qabiletti. Ol daıyndalmaǵan alańdarǵa qona alady. –50-den +50 °C-qa deıingi keń temperatýralyq dıapazonda jumys isteıdi. Bul sıpattamalar ony qıyn qoljetimdi aımaqtarda jáne qatal klımat jaǵdaıynda paıdalanýǵa tıimdi etedi. Ushaq sanıtarlyq avıatsııa mindetterin oryndaý úshin de qoldanylýy múmkin. Bortta aýyr naýqastardy tasymaldaýǵa arnalǵan zamanaýı zembilder men jabdyq ornatylǵan. Qajet bolǵan jaǵdaıda áýe kemesin qosymsha medıtsınalyq tehnıkamen jabdyqtaýǵa bolady, — delingen aqparatta.

Aıta keteıik, Tótenshe jaǵdaılar mınıstrligi qutqarý isine jasandy ıntellektini engizip jatyr.