TJM avıatsııa parki taǵy bir zamanaýı ushaqpen tolyqty
ASTANA. KAZINFORM — Óskemen halyqaralyq áýejaıynda jańa kópmaqsatty L-410 ushaǵy tanystyryldy, dep habarlaıdy TJM baspasóz qyzmeti.
Shyǵys Qazaqstan oblysy TJD bastyǵy Rashıd Blıalovtyń aıtýynsha, áýe kemesi tótenshe jaǵdaılar kezinde jedel áreket etý, izdestirý-qutqarý jumystaryn júrgizý jumystaryna jumyldyrylady.
— Turǵyndarynyń edáýir bóligi taýly jáne jetýi qıyn aýmaqtarda ornalasqan bizdiń óńir úshin L-410 ushaǵynyń kelýi erekshe mańyzǵa ıe. Bul áýe kemesi tótenshe jaǵdaılar kezinde jedel áreket etý, izdestirý-qutqarý jumystaryn júrgizý jáne sanıtarlyq reısterdi oryndaý múmkindigin aıtarlyqtaı arttyrady, — dedi Shyǵys Qazaqstan oblysy TJD bastyǵy Rashıd Blıalov.
Zamanaýı L-410 ushaǵy óńirdegi TJM avıatsııasynyń múmkindikterin edáýir keńeıtedi. Áýe kemesi tótenshe jaǵdaılarǵa jedel den qoıýǵa, gýmanıtarlyq kómekti jetkizýge, qutqarýshylardy tasymaldaýǵa jáne jetýi qıyn aımaqtardan halyqty evakýatsııalaýǵa arnalǵan. Ásirese kúrdeli relefi, taýly aýmaǵy jáne qatal klımattyq jaǵdaılary bar Shyǵys Qazaqstan oblysy úshin mańyzdy.
L-410 ushaǵy 2570 shaqyrymǵa deıin ushýǵa, 6100 metr bıiktikke kóterilýge jáne 19 jolaýshyny nemese 1800 kelige deıin júk tasymaldaýǵa qabiletti. Kabınasy dál navıgatsııany jáne ushý parametrlerin tolyq baqylaýdy qamtamasyz etetin zamanaýı Garmin 3000 avıonıkasymen jaraqtalǵan. Osy model sanıtarlyq avıatsııaǵa da beıimdelgen. Bortta aýyr naýqastardy tasymaldaýǵa arnalǵan zamanaýı zembilder men arnaıy júıeler ornatylǵan.
Jaqyn ýaqytta oblys ákimdiginiń qoldaýymen áýe kemesin saqtaý jáne tehnıkalyq qyzmet kórsetýge arnalǵan angardyń qurylysy bastalady. Sondaı-aq óńir ekıpaj úshin jumys jáne demalysqa qolaıly jaǵdaı jasaýdy qamtamasyz etýge qatysady. Ekıpaj Chehııada ushaqty shyǵarǵan Omnipol kompanııasynyń oqý ortalyǵynda oqýdan ótti. Daıyndyq baǵdarlamasy ushý bóligin de, áýe kemesine tehnıkalyq qyzmet kórsetýdi de qamtydy.
Osyǵan deıin el aýmaǵynda qustardyń ushaqtarmen soqtyǵysýy derekteri nege kóbeıgenin jazdyq.
