TJM aýa raıyna baılanysty turǵyndarǵa eskertý jasady
ASTANA. KAZINFORM — QR Tótenshe jaǵdaılar mınıstrligi azamattardy qys mezgilinde saqtyq sharalaryn qatań saqtaýǵa, daýyldy eskertýlerdi turaqty qadaǵalaýǵa jáne qolaısyz aýa raıy jaǵdaıynda alys saparlarǵa shyqpaýǵa shaqyrady.
Vedomstvo málimetinshe, aýyl turǵyndaryna aýa raıy nasharlaǵan kezde uzaq serýendeýden bas tartý usynylady.
Aýa raıynyń nasharlaýy týraly daýyldy eskertýler, sondaı-aq avtojoldardyń jabylýy jónindegi aqparat turǵyndarǵa SMS-habarlamalar, ınternet-resýrstar jáne áleýmettik jeliler arqyly jetkiziledi.
Sonymen qatar Tótenshe jaǵdaılar mınıstrligi halyqtyń nazaryn qysqy kezeńde áli qatpaǵan muzǵa shyǵýdyń qaýipti ekenine aýdarady jáne sý aıdyndarynda bolǵan kezde qaýipsizdik talaptaryn qatań saqtaýǵa shaqyrady.
Qysqy kezeńdegi tótenshe jaǵdaılarǵa jedel den qoıý maqsatynda 44 myńnan astam jeke quram jáne 14 myńnan astam tehnıka tartylatyn kúshter men quraldar toby daıyndalǵan.
- El óńirlerinde 1 681 jylytý pýnkti ázirlendi. Budan bólek, TJM-niń 40 trassalyq medıtsınalyq-qutqarý pýnkti qajet bolǵan jaǵdaıda jylytý pýnktteri retinde paıdalanylatyn bolady, - delingen vedomstvo aqparatynda.
Aıta keteıik, TJM turǵyndarǵa qar kóshkinine baılanysty eskertý jasady.