TJM áskerine jyl saıyn shamamen 800 sarbaz shaqyrylady
ASTANA. KAZINFORM – Tótenshe jaǵdaılar mınıstrligi áskerı bólimderine jyl saıyn shamamen 800 merzimdi áskerı qyzmetshi shaqyrylatynyn málimdedi.
Bıylǵy kóktemgi shaqyrý naýqany aıasynda vedomstvonyń áskerı bólimderine elimizdiń 16 óńirinen 400-den astam áskerge shaqyrylýshy jiberiledi.
Mınıstrlik málimetinshe, merzimdi áskerı qyzmetten keıin kelisimshart negizinde qyzmetin jalǵastyratyn sarbazdar sany artyp keledi. Máselen, ótken shaqyrý qorytyndysy boıynsha 51 áskerı qyzmetshi kelisimshartpen qyzmet atqarýǵa sheshim qabyldaǵan.
Áskerge shaqyrylýshylardy sapaly irikteý úshin tótenshe jaǵdaılar departamentteri men áskerı bólimderde arnaıy jumys toptary qurylǵan. Olardyń quramyna ofıtserler, medıtsına mamandary men psıhologtar engizilgen.
– Bul bolashaq áskerı qyzmetshilerdiń densaýlyq jaǵdaıy men kásibı jaramdylyǵyn jan-jaqty baǵalaýǵa múmkindik beredi, – delingen habarlamada.
Qazirgi ýaqytta TJM qaramaǵynda azamattyq qorǵanystyń bes áskerı bólimi jumys isteıdi. Olar Qaraǵandy, Uzynaǵash aýyly, Semeı, Aqtóbe jáne Aqkól qalalarynda ornalasqan.
Sonymen qatar ekinshi qutqarý batalondary Almaty, Oral, Óskemen jáne Qostanaı qalalarynda qyzmet atqarady.
Mınıstrlik áskerı qyzmetshilerdiń bilim alýyna da erekshe kóńil bólinetinin atap ótti. «Merzimdi áskerı qyzmetshiler – 2.0» baǵdarlamasy aıasynda ótken jyly 59 sarbaz joǵary oqý oryndaryna túsý úshin memlekettik bilim granttaryn ıelengen. Onyń ishinde 23 áskerı qyzmetshi áskerı joǵary oqý oryndaryna qabyldanǵan.
Budan bólek, «Jumysshy mamandyqtar jyly» aıasynda bilim berý uıymdarymen 20 memorandým jasalǵan. 500-den astam áskerı qyzmetshi júrgizýshi, aspaz, gazelektrdánekerleýshi, alpınıst, mobılograf jáne ushqyshsyz ushý apparattarynyń mamany sekildi qosymsha mamandyqtar boıynsha bilim alǵan.
Aıta keteıik, TJM áskerı bólimderi tabıǵı jáne tehnogendik sıpattaǵy tótenshe jaǵdaılarǵa jedel áreket etý mindetin atqarady.
Qazir Qazaqstan áskeri urys qımyldarynyń jańa formatyna beıimdelip jatyr.
