TJM Apattar medıtsınasy ortalyǵy tótenshe jaǵdaılarǵa arnalǵan kólik satyp aldy
ASTANA. KAZINFORM - QR Tótenshe jaǵdaılar mınıstrligi Apattar medıtsınasy ortalyǵy tótenshe jaǵdaılar kezinde shuǵyl medıtsınalyq kómek kórsetýge arnalǵan mamandandyrylǵan avtokólikpen tolyqty.
Bul jańashyldyq TJM medıtsına mamandary jumysynyń jedeldigi men tıimdiligin edáýir arttyratyn, sondaı-aq eń qıyn jaǵdaılarda zardap shekkenderge jyldam jáne sapaly qol jetkizýdi qamtamasyz etetin negizgi faktor bolady.
Jańa kólik quralynyń kiltin QR Tótenshe jaǵdaılar mınıstri general-maıor Shyńǵys Árinov tapsyrdy. Vedomstvo basshysy jeke quramǵa bul bastamanyń aýyldyq jerlerdegi qyzmettiń jumysyn jaqsartý úshin mańyzdy ekenin atap ótti.
«Mınıstrlik Prezıdenttiń qoldaýymen bizdiń vedomstvonyń medıtsınalyq qyzmetin, ásirese aýyldyq jerlerde ony damytýǵa erekshe kóńil bóledi. Shalǵaıdaǵy eldi mekenderde kómekke qol jetimdiligi shekteýli bolǵan jaǵdaıda, biz ınfraqurylymdy jańǵyrtyp qana qoımaı, bólimshelerimizdi eń zamanaýı quraldarmen jabdyqtaýǵa tyrysamyz. Kólik qıyn marshrýttarda da júre alady. Bul jaı ǵana kólik quraly emes, bul bizdiń jumysymyzdyń mańyzdy bóliginiń biri. Zardap shekken azamattar úshin tez arada jáne eń qıyn jaǵdaılarda jedel áreket etý múmkindigin qamtamasyz etedi»,- dedi TJM basshysy.
TJM Apattar medıtsınasy ortalyǵyna kelip túsken jańa avtokólik tótenshe jaǵdaılar kezinde, ásirese shalǵaı jáne qol jetkizý qıyn aýdandarda jumys isteý úshin asa mańyzdy jol talǵamaıtynymen erekshelenedi. Kólik ozyq medıtsınalyq quraldarmen jabdyqtalǵan. Sonymen qatar kúrdeli tótenshe jaǵdaılar kezinde jedel jáne sapaly kómek kórsetýge múmkindik beredi.
Atalmysh kólik Aqmola oblysynyń Makınsk qalasynda paıdalanylatyn bolady. Onda jaqynda jańa ámbebap qutqarý bólimshesi ashyldy jáne mundaı kólikter suranysqa ıe.
«Buǵan deıin jol-kólik oqıǵalary oryn alǵan respýblıkalyq avtojoldarǵa barǵan bizdiń mamandar dárigerge deıingi alǵashqy kómekti ǵana kórsete alatyn. Eger zardap shekkender kólikte qysylyp qalsa, biz arnaıy jabdyq kelgenshe kútetinbiz. Endi gıdravlıkalyq quraldarmen jabdyqtalǵan jańa avtokóliktiń arqasynda biz alǵashqy kómek kórsetip qana qoımaı, qutqarý jumystaryn júrgize alamyz», — dep túsindirdi TJM AMO MM dırektory Sáken Áripbaev.
Bul tek jańa kólik satyp alý ǵana emes, bul – Qazaqstan TJM jumysyn jandandyrýdaǵy mańyzdy kezeń. Sondaı-aq kez kelgen jaǵdaıda qyzmettiń shuǵyl áreket etýge daıyndyǵyn arttyrý men jańǵyrtýdyń strategııalyq baǵdarlamasynyń bóligi bolyp tabylady. Jańa kólik azamattardyń qaýipsizdigin qamtamasyz etý jáne shuǵyl kómek kórsetýde is-qımyldardy úılestirýdi, jedeldik pen tıimdilikti aıtarlyqtaı jaqsartady.
Aıta keteıik, buǵan deıin TJM eldegi jol apattarynyń basty sebepterin atady.