TJM: Almaty oblysynyń Qora shatqalyn áli tútin basyp jatyr
ALMATY. QazAqparat - 2021 jylǵy 29 qyrkúıek saǵat 08-30-daǵy jaǵdaı boıynsha Almaty oblysy Eskeldi aýdany Qora shatqalynda ár jerde janyp jatqan órt oshaqtary bar, aımaqta qoıý tútin basyp jatyr, dep habarlaıdy QazAqparat Almaty oblystyq Tótenshe jaǵdaılar departamentiniń baspasóz qyzmetine silteme jasap.
Órt shyqqan jerde Taldyqorǵan orman sharýashylyǵynyń, Qazavıaormanqorǵaý, Almaty oblysynyń TJD, jergilikti atqarýshy organdardyń kúshteri men quraldary jumys júrgizýde. QR TJM «Qazavıaqutqarý» AQ tikushaǵy sý shashyp jatyr.
Oqıǵa ornynda shtab uıymdastyryldy. Úzdiksiz baılanysty uıymdastyrý úshin komandalyq - shtabtyq mashına, aerovızýaldy baqylaý úshin-pılotsyz - ushý apparaty bar jedel top-dron jiberildi.
Órtti sóndirýge barlyǵy 105 adam, 17 birlik tehnıka, 8 motopompa: Almaty oblysy TJD 51 qyzmetker, 10 birlik tehnıka jáne 4 motopompa, Taldyqorǵan orman sharýashylyǵynan 35 qyzmetker, 5 birlik tehnıka jáne 4 motopompa, Qazavıaormanqorǵaý mekemesinen 5 qyzmetker jáne jergilikti atqarýshy organdardan 10 qyzmetker men 2 birlik tehnıka, sondaı-aq QR TJM «Qazavıaqutqarý» AQ 1 bort tikushaǵy jáne 4 adam ekıpaj jumyldyryldy.
Eskeldi aýdanynyń ákimdigi órtti sóndirýge jumyldyrylǵan adamdarǵa ystyq tamaq uıymdastyrdy.
Eldi mekenderge qaýip joq. Eń jaqyn eldi meken - Tekeli qalasy 17 shaqyrym qashyqtyqta ornalasqan.
Esterińizge sala keteıik, 27 qyrkúıekte saǵat 15.19-da Almaty oblysy Eskeldi aýdanynyń Qora shatqalynda Taldyqorǵan orman shylyǵynyń aýmaǵyndaǵy altynshy omarta aýdanynda jetýi qıyn taýly jerlerde qurǵaq shóp, butalar, aralas orman janǵan bolatyn.
