TJM Almaty oblysyndaǵy órtke qatysty málimettermen bólisti
NUR-SULTAN. QazAqparat – Almaty oblysynda ekinshi jáne úshinshi órt oshaqtaryn sóndiririlip jatyr. Bul týraly QR TJM resmı ókili Talǵat Ýálı málim etti, dep habarlaıdy QazAqparat tilshisi.
«15 sáýir kúni saǵat 09.45-te Almaty oblysy Balqash aýdanynyń Jıdeli aýyldyq okrýginen 25 shaqyrym jerde qurǵaq shóp pen qamys órtendi. Órt kólemi anyqtalyp jatyr. Órt sharýa qojalyqtarynyń aýmaqtaryna jáne jeke demalys bazalarynyń jerlerine taraldy. Órt ornyna jedel túrde Balqash aýdanyna qarasty Qapshaǵaı qalasy men Baqanas aýylynyń órt sóndirý bólimderinen 18 qyzmetker men 5 birlik tehnıka jiberildi», - dedi ol.
Onyń atap ótýinshe, tótenshe jaǵdaı ornyna barar joldyń nashar bolýyna baılanysty kúshter men quraldardyń qozǵalysy aıtarlyqtaı qıyndady. Órt ornyna deıingi qashyqtyq shamamen 180-200 shaqyrym. Telefon baılanysy bolmaǵandyqtan, jedel toptyń jeke quramy baılanysty uıymdastyrý úshin alyp júretin spýtnık termınaldarmen qamtamasyz etildi.
«13 sáýirden beri TJD men jergilikti atqarýshy organdardyń kúshteri jáne quraldary Balqash aýdanynyń Jeltorańǵy, Aqkól aýyldyq okrýgteriniń aýmaqtaryndaǵy oshaqtardy sóndirýde. Barlyǵy úsh órt oshaǵy bar. 20 gektar alańdyq quraıtyn alǵashqy oshaq saǵat 10.30-da sóndirildi. Ekinshi jáne úshinshi órt oshaqtaryn sóndirý jumystary jalǵasýda», - dedi resmı ókil.
Talǵat Ýálı qýraǵan aǵashtardyń janý oqıǵalarynyń jıileýine baılanysty 12 sáýirden bastap Balqash aýdanynda jedel shtab qurylǵanyn aıtady. Onda Tótenshe jaǵdaılar departamentiniń kúshteri men quraldary jumys isteıdi. Qazavıaormanqorǵaý mekemesiniń ushaǵymen ýchaskelerdi aerovızýaldy tekserý uıymdastyryldy.
Buǵan deıin Almaty oblysyndaǵy órt saldarynan balyq sharýashylyǵyna zııan kelip, bir adam zardap shekkenin habarlaǵan edik.
