TJM: Aldaǵy kúnderi taýlarda qar kóshkini júrýi múmkin
ASTANA. KAZINFORM – TJM-niń Qazseldenqorǵaý mekemesi qar kóshkini qaýpi bar aýmaqtarǵa turaqty monıtorıng júrgizip jatyr. Mamandar 255 jerústi tekserý ótkizip, yqtımal qaýipti aımaqtarǵa 110 eskertý belgisin ornatqan.
Baqylaýlar nátıjesinde taýly óńirlerde qar jamylǵysynyń qarqyndy jınalýy jalǵasyp jatqany jáne ózdiginen qar kóshkini júrý qaýpi saqtalyp otyrǵany anyqtaldy.
2025-2026 jyldardaǵy kóshkin qaýpi bar kezeń bastalǵaly beri, ıaǵnı 2025 jylǵy qarashadan bastap Almaty qalasy men Jambyl oblysy aýmaǵynda jalpy kólemi 55 260 tekshe metr qar massasyn quraıtyn 23 ózdiginen qar kóshkini tirkelgen.
Halyq qaýipsizdigin qamtamasyz etý maqsatynda Almaty qalasynda, Almaty oblysy jáne Shyǵys Qazaqstan oblysy aýmaqtarynda jalpy kólemi 24 376 tekshe metr bolatyn 32 profılaktıkalyq qar kóshkinin túsirý jumystary júrgizildi.
- Qazirgi ýaqytta Túrkistan, Jambyl, Almaty jáne Jetisý oblystary taýly aımaqtarynda qar jamylǵysynyń bıiktigi qalypty deńgeıden joǵary. Qazgıdromet boljamyna sáıkes, 2026 jylǵy 19-20 aqpanda ońtústik jáne ońtústik-shyǵys óńirlerdiń taýlarynda jaýyn-shashyn – jańbyr men qar kútiledi.
Shyǵys Qazaqstan oblysynyń taýlarynda qar jamylǵysy ortasha deńgeıde. 19 aqpanda kúnniń jylynýyna baılanysty jaýyn-shashyn, keı jerlerde qalyń qar jáne boran boljanyp otyr. 20 aqpanda aýa temperatýrasynyń kúrt tómendeýi yqtımal, - delingen aqparatta.
Mamandardyń aıtýynsha, kúnniń jylynýy, qar jaýýy, jaýyn-shashyn, boran jáne temperatýranyń aýytqýy taýlardaǵy qar jamylǵysynyń turaqsyzdyǵyn kúsheıtedi. Aldaǵy kúnderi ózdiginen qar kóshkini júrý yqtımaldyǵy joǵary.
TJM kóshkin qaýpi jarııalanǵan kezeńde taýly aımaqtarǵa barmaýǵa, taýǵa shyǵar aldynda aýa raıy boljamymen tanysýǵa, marshrýtty aldyn ala josparlaýǵa, daıyndalmaǵan jerlerde júrmeýge jáne belgilengen baǵyttardy ustanýǵa keńes beredi. Sondaı-aq qar kóshkini qaýpi bar ýchaskeler týraly sońǵy aqparatty bilip, qaýipti betkeılerden aýlaq bolý qajet.
Qalyń qar jaýǵan jaǵdaıda taýǵa shyǵýdy qar qabaty turaqtalǵanǵa deıin 2–3 kúnge keıinge qaldyrý usynylady.
Aıta keteıik, Shymbulaq mańynda qar kóshkini astynda qalǵan adam qutqaryldy.