TJM: Aqsaı shatqalyndaǵy 5 gektardy sharpyǵan órt turǵyn úılerge taralǵan joq
QONAEV. KAZINFORM – Almaty oblysy Qarasaı aýdanyndaǵy Kóklaısaı saıajaılary mańynda qýraǵan shóptiń janýy tirkeldi. Órt Aqsaı shatqaly aýmaǵynda shyqqan. Bul týraly Tótenshe jaǵdaılar mınıstrliginiń baspasóz qyzmeti málim etti.
Vedomstvo málimetinshe, oqıǵa ornyna Almaty oblysy jáne Almaty qalasy Tótenshe jaǵdaılar departamentteriniń, QR TJM 28237 áskerı bóliminiń jeke quramy men tehnıkasy, sondaı-aq Memlekettik ulttyq tabıǵı park qyzmetkerleri jumyldyrylǵan.
Jalpy sany 150-den astam adam men 20 tehnıka tartyldy.
«Qutqarýshylardyń jedel áreketiniń nátıjesinde órttiń turǵyn úıler men jaqyn mańdaǵy ýchaskelerge taralý qaýpi joıyldy. Aldyn ala aqparat boıynsha, órt aýmaǵy 5 gektardy quraıdy. Zardap shekkender joq», – delingen habarlamada.
Saıajaı turǵyndary aldyn ala evakýatsııalandy.
QR TJM «Qazavıaqutqarý» mekemesiniń sý aǵyzý qurylǵysy bar Mı-8 tikushaǵy da órt sóndirý jumystaryna jumyldyryldy.
Qıyn relef pen qolaısyz aýa raıyna qaramastan, órtti sóndirý jalǵasyp jatyr.
Aıta keteıik, Tarazda óndiristik tseh órtendi.