TjKB muǵalimderine arnalǵan ulttyq biliktilik test ázirlenýde
ASTANA. QazAqparat - Elimizde tehnıkalyq jáne kásiptik bilim berý júıesinde (TjKB) tálim beretin muǵalimderge arnalǵan ulttyq biliktilik test ázirlenip jatyr. Bul týraly májilismenderdiń depýtattyq saýalyna bergen jaýabynda QR Premer-Mınıstriniń orynbasary Erbolat Dosaev atap ótken, dep habarlaıdy QazAqparat tilshisi.
Aıta ketsek, buǵan deıin Parlament Májilisiniń depýtattary kásiptik-tehnıkalyq bilim berý salasyndaǵy ózekti máselelerdi qozǵap, QR Premer-Mınıstriniń orynbasary Erbolat Dosaevqa depýtattyq saýal joldaǵan bolatyn. Olardyń aıtýynsha, biliktilik sanatyna qosymsha aqy berilmeıtindikten, jalaqy deńgeıiniń tómendigi TjKB júıesine tájirıbeli oqytýshylardy tartýǵa múmkindik bermeı otyr.
Saýalǵa jaýap bergen Erbolat Dosaevtyń habarlaýynsha, tehnıkalyq jáne kásiptik bilim berý júıesinde (TjKB) qazirgi tańda Qazaqstanda 824 kolledj bar. Onda 37 myń ınjener-pedagog kadrlar (IPK) men óndiristik oqý sheberleri jumys isteıdi.
«Memleket basshysynyń 2018 jylǵy 10 qańtardaǵy Joldaýyn iske asyrý barysynda mektep muǵalimderin attestattaý júıesiniń jańa tásilderi ázirlengen. Kolledj oqytýshylary men óndiristik oqý sheberleri bul attestattaý júıesine kirmeıdi. Olarǵa biliktilik sanattary úshin (mektep muǵalimderimen birdeı) qosymsha aqy tóleý kózdelmegen», - deıdi Erbolat Dosaev.
Onyń jaýabyna sáıkes, búgingi kúni «NZM» DBU deńgeılik kýrstardan ótken muǵalimderge qosymsha aqy kózdelmeıdi.
«Bilim berý júıesin damytýdyń negizgi maqsattarynyń biri pedagogtiń biliktilik deńgeıine tıisti qosymsha aqy tóleýmen sapaly bilimdi qamtamasyz etý bolyp tabylady. Soǵan baılanysty TjBK júıesi úshin «NZM» DBU tájirıbesin qoldaný qarastyrylmaıdy», - delingen jaýapta.
Jaýapqa súıensek, pedagogterdi attestattaý jáne olardyń jalaqysyn joǵarylatý máselelerin júıege keltirý maqsatynda QR BǴM jumys tobyn qurǵan. Olar 9-synyp bazasynda oqýǵa túsken stýdentterdi oqytatyn jalpy bilim berý pánderiniń oqytýshylaryna jańartylǵan bilim berý mazmuny jaǵdaıyndaǵy jumystary úshin qosymsha aqy belgileý máselelerin (30% kóleminde, 10-11 synyptardy aýystyrý 2019 jáne 2020 jyldarǵa josparlanǵan) jáne aǵylshyn tilinde sabaq júrgizgeni úshin (LJ 200%), sondaı-aq olardy muǵalimderdi attestattaýdyń jańa júıesine qosý máselelerin (30% - dan 50% - ǵa deıin qosymsha aqymen) qaraıtyn bolady.
«Sondaı-aq jumys toby TjKB uıymdarynyń arnaıy pánder oqytýshylary men óndiristik oqý sheberleri úshin ulttyq biliktilik test ázirleý boıynsha máselelerin qarastyrýda (sanaty úshin 30% - dan 50% - ǵa deıin qosymsha aqy belgileý, 8 myńǵa jýyq adam). Joǵaryda baıandalǵandardy eskere otyryp, Bilim jáne ǵylym mınıstrligi kórsetilgen baǵytta jumysty belgilengen tártipte jalǵastyratyn bolady», - deıdi Erbolat Dosaev.
