TJK jer silkinisi týraly SMS-tiń nelikten kesh kelgenin túsindirdi

ALMATY.QazAqparat - Almatydaǵy jer silkinisinen keıin áleýmettik jelilerde Tótenshe jaǵdaılar komıtetiniń habarlandyrý júıesine qatysty saýaldar kóbeıdi, dep habarlaıdy QazAqparat tilshisi.

Almatylyqtar tótenshe jaǵdaı qyzmetkerlerinen tańerteń ǵana únsiz kelgen SMS habarlamalardy kúlkige aınaldyrdy. Syn-eskertpeler atalǵan vedomstvo qyzmetine qatysty bolǵandyqtan Tótenshe jaǵdaılar komıteti  oqıǵaǵa qatysty túsinik berdi.

 

«Almatyda TJ boıynsha halyqty qulaqtandyrýdyń eki algorıtimi jumys jasaıdy. Birinshisi, halyqty dabyl-sózdik qurylǵylary, elektrsırenalar arqyly «Barlyǵyńyz nazar aýdaryńyz!» degen sózin BAQ jáne SMS arqyly taratý bolsa, ekinshisi, BAQ jáne SMS arqyly arnaıy dybystyq belgilerdi qoldanbaı eskertý júıesi. Búgin, tańerteń TJD basshylyǵy osy ekinshi algorıtm boıynsha eskertý týraly sheshim qabyladady», - dedi QR ІІM TJK resmı ókili Rýslan Imanqulov.

Onyń aıtýynsha, mundaı sheshim arnaıy júrgizilgen monıtorıng negizinde qabyldanǵan.

«Іshki ister departamentiniń patrýl jasaqtary óz ýchaskelerinde zaqymdanǵan nysandar joq ekenin, barlyq gıdrotehnıkalyq qurylǵylar baqylaýda bolǵanyn, gıdrobeketterden jedel aqparattar alynyp turǵanyn aıtyp, ahýaldyń turaqty ekenin jetkizdi. Tańsáride turǵyndar arasynda úreı týǵyzbas úshin elektrodabyl qurlyǵylaryn paıdalanbaı, tek dybyssyz SMS arqyly habarlandyrý týraly sheshim qabyldandy», - dep túsindirdi Rýslan Imanqulov.

Sondaı-aq, Komıtet ókili qazirgi ýaqytta uıaly baılanys operatorlarynyń tehnologııasy mátini bar SMS habarlamalardy birden jan jaqqa tarata almaıtynyn aıtty. Onyń aıtýynsha, shamamen, 20-40 mınýt abonentterdi bazadan irikteý jumystaryna (sońǵy 15-30 kún ishinde Qazaqstan aýmaǵynda bolǵandyǵyn anyqtaý-red.) ketedi. SMS habarlamalar bir saǵat ishinde 200 myńnan 350 myńǵa deıin abonenterge jetedi.

«Búgingi kún tehnologııasynyń múmkindigi osy. Qazirgi SMS habarlama taratý júıesin jedel, shuǵyl aqparat taratý quraly emes, habarlandyrý, qulaqtandyrý quraly dep qarastyrý kerek. Búgingi tańda jer silkinisin dál boljaıtyn tehnologııa joq», - deıdi R.Imanqulov.

Eske sala keteıik, 9 tamyz kúni saǵat 5.28-de jer silkindi. Jer silkinisiniń oshaǵy Almatydan 485 shaqyrym qashyqtyqta bolǵan. Almatylyqtar 4 baldyq jer terbelisin sezdi.