TJK: Taıynsha aýdanyndaǵy sý basý saldaryn jedel joıý úshin onda qosymsha kúshter jiberildi
ASTANA. QazAqparat - SQO-da qardyń kúrt erý saldarynan oryn alǵan tótenshe jaǵdaıdyń zardaptaryn joıýdy jyldamdatý úshin aımaqqa qosymsha kúshter jiberildi.
«Soltústik Qazaqstan oblysynyń Taıynsha aýdanynda qardyń kúrt erýi saldarynan bolǵan tótenshe jaǵdaıdyń joıylýyn jyldamdatý maqsatynda TJK búgin Donetskoe aýylyna Astana qalalyq TJD-nyń jáne Ortalyq aımaqtyq aeromobıldik jedel-qutqarý jasaǵy qutqarýshy bólimsheleriniń kúshteri men tehnıkalaryn jiberdi», - dep habarlady QR ІІM TJK-nyń resmı ókili Rýslan Imanqulov.
Jumyldyrylǵan kúshter men quraldarǵa qosymsha retinde jeke quramnyń 43 adamy men 18 tehnıkasy bólindi.
R.Imanqulovtyń aıtýynsha, qazirgi kezde ınjenerlik qyzmetter, ІІM-niń bólimsheleri, bılik organdary jáne basqarmanyń qoldanǵan sharalarynyń nátıjesinde sý basqan aýmaqta sý deńgeıi tómendep, 25 aýladaǵy sý ketti, arnaıy qurylǵan komıssııa sý basqan úılerdi tekserý jumystaryn júrgizip jatyr.
Budan basqa, kóktem mezgilinde qutqarý kúshterin kúsheıtý jáne tótenshe jaǵdaılardyń oryn alýy kezinde keltiriletin shyǵyndy azaıtý maqsatynda Aqmola oblysyna Almaty, Qyzylorda oblysy boıynsha TJ departamentteriniń qutqarý jasaqtary, respýblıkalyq jedel-qutqarý jasaǵy, Ońtústik aımaqtyq aeromobıldik jedel-qutqarý jasaǵynyń 100 adam, 38 tehnıkasy jiberildi.
