TJK: Sýǵa ketken balalardyń basym bóligi - uldar
ASTANA. QazAqparat - Jyl basynan beri Qazaqstannyń sý aıdyndarynda 137 adam mert boldy, onyń 53-i - balalar, dep habarlaıdy QazAqparat tilshisi.
Bul týraly QR ІІM Tótenshe jaǵdaılar komıtetiniń tóraǵasy V. Bekker Astanada ótken baspasóz máslıhatynda málimdedi.
"Ótken jyldyń 9 shildesine deıingi aralyqta 170 adam, onyń ishinde 77 bala sýda qaza tapqan edi. Bıyl da alǵashqy jartyjyldyqta 137 adam mert boldy, onyń ishinde 53 bala bar. Qaza tapqandardyń 81%-y nemese 112-si shomylý maýsymy bastalǵanda sýǵa ketti", - dedi V. Bekker baspasóz máslıhatynda.
Komıtet tóraǵasynyń aıtýynsha, ótken aptada 45 adam sýǵa ketken, onyń ishinde 15 bala bar. Olardyń basym bóligi Shyǵys Qazaqstan oblysynda (8 adam, onyń úsheýi - balalar), Qaraǵandy (6/4) jáne Atyraý oblystarynda (5/2) qaza tapqan.
"Balalardyń ólimin zertteı kele, qaıǵyly oqıǵalar 15:00 - 18:00 aralyǵynda jıi bolatyny anyqtaldy. Jáne qaza tapqan balalardyń kópshiligi 3-10 jasta bolǵan. Olardyń arasynda er balalar kóp. Demek, ata-ana qaraýynsyz qalǵan balalar oınap júrip, qalaı ólip ketkenderin de bilmeıdi. Osy oraıda Bilim jáne ǵylym mınıstrligimen birlesip, óńirlerde aýla klýbtaryn, mektep janyndaǵy lagerlerdi jáne sporttyq úıirmelerdi jandandyrýǵa kúsh salyp jatyrmyz", - dep óz sózin tolyqtyrdy ol.
Aıta keteıik, elimizdiń aýmaǵynda 50 myńnan astam sý qoımasy bar. Alaıda, olardyń tek 100-ge jýyǵynda ǵana qutqarýshylar jumys isteıdi. Barlyq sý qoımalaryn qutqarýshylarmen qamtamasyz etý ázirshe múmkin emes.
Ótken senbi, jeksenbi kúnderi Qazaqstan aýmaǵynda 20 adam sýǵa batyp ketti.
