TJK ózen-kólderdiń betindegi muzdyń juqarýyna baılanysty saqtyq sharalaryn eskertti
NUR-SULTAN. QazAqparat - Kóktemgi sý tasqynyn qaýipsiz ótkizýdiń mańyzdy protsesteriniń biri — sý qoımalarynan sýdy birkelki aǵyzý. Al sý qoımalarynda tasqyn sý úshin bos kólemderdi qurý deńgeıin durys eseptemeý ózenderge jaqyn ornalasqan eldi mekenderge aıtarlyqtaı zalal tıgizýi múmkin. Sondyqtan jaǵdaı turaqty baqylaýda, dep habarlaıdy QR ІІM TJK baspasóz qyzmeti.
Vedomstvo málimetine saı, qazirgi ýaqytta elimizdiń sý qoımalarynda bos kólemderdi qurý úshin sý aǵyzý protsesi júrip jatyr. Ózenge sý aǵyzýǵa baılanysty muz qatý báseńdeıdi. Sonymen qatar, buǵan aýanyń ortasha táýliktik temperatýrasynyń joǵarylaýy yqpal etedi. Osy ýaqytta muz ústimen júrý óte qaýipti. Al muzǵa avtokólikpen, qarda júretin mashınamen shyǵý múlde qaýipti.
«Kóktemgi sý tasqyny kezinde eki negizgi qaýip basym, olar áýesqoı balyqshylar men mektep jasyndaǵy balalar. Áýesqoı balyqshylar osy erejelerdi saqtamaı ǵana qoımaı, tártip buzýshylar bolyp tabylady. Qaýip-qaterge qaramastan, balyqshylar kóktemgi muzǵa shyǵýdy jalǵastyrýda. Jyl saıyn muzda nemquraıdylyqtan jazataıym oqıǵalar oryn alyp, adamdar qaza bolady. Elimizdiń sý aıdyndarynda aǵymdaǵy ań aýlaý men balyq aýlaý maýsymy bastalǵannan beri 44 adam, onyń ishinde 31 balyqshy jáne 12 bala kóz jumdy» dep habarlaıdy Tótenshe jaǵdaılar komıteti.
Jalpy, adamdardyń qaza bolýyna jol bermeý jáne sý aıdyndarynda (muzda) tótenshe jaǵdaılarǵa jedel áreket etý úshin TJK aldyn alý is-sharalary keshenin júrgizedi. TJD qyzmetkerleri balyq aýlaý oryndarynda, ań aýlaý dúkenderinde reıdter júrgizedi, olardyń barysynda balyqshylarǵa jadynamalar taratady, balyq aýlaý kezinde muzdyń júris-turys qaǵıdalaryn saqtaý boıynsha nusqamalar júrgizedi. Elimizdiń oqý oryndarynda muz ústinde bolǵan kezde qaýipsizdik sharalaryn oqýshylarǵa jetkizý boıynsha ınteraktıvti sabaqtar ótkiziledi.
«QR ІІM Tótenshe jaǵdaılar komıteti azamattarǵa muz ústine shyqpaýǵa keńes beredi. Sý aıdyndaryn keship ótýge qatań tyıym salynady. Ásirese, ózendegi muz ashylǵan kezde oınaýǵa múlde bolmaıdy. Bul qaıǵyly jaǵdaılarǵa ákelýi múmkin. Ata-analar balalarǵa jáne olar júrgen jerde baqylaýdy kúsheıtýi kerek. Eresek adamdardyń baqylaýynsyz balalardyń ózenge, ásirese muz júrý kezinde barýyna jol bermeńiz. Ózińizdi jáne jaqyndaryńyzdy saqtańyz!» delingen habarlamada.
