TJK: Ótken jeksenbide el aýmaǵynda 24 tabıǵı órt tirkeldi
NUR-SULTAN. QazAqparat – Qazaqstan aýmaǵynda ótken jeksenbide 24 tabıǵı órt tirkeldi. Bul týraly elordada ótken baspasóz máslıhatynda QR Tótenshe jaǵdaılar komıtetiniń tóraǵasy Vladımır Bekker málim etti, dep habarlaıdy QazAqparat tilshisi.
«Keshegi kún azamattyq qorǵaý organdary úshin óte aýyr boldy. Sebebi, respýblıka aýmaǵynda jeksenbide 24 tabıǵı órt tirkeldi. Onyń ishinde beseýi orman qorlary aýmaǵynda bolǵan. Eń kóp órt jaǵdaılary Aqmola oblysynda (7), Qaraǵandy (13 órt) men Pavlodar oblysynda (5 órt) boldy», - dedi Vladımır Bekker.
Komıtet tóraǵasy Aqmola oblysynyń Ereımentaý aýdanyndaǵy Qarǵaly aýylynan 8 shaqyrym qashyqtyqtaǵy «Ereımentaý» ulttyq tabıǵı parkindegi 110 ga alańda qurǵaq shóptiń órtengenin atap ótti.
«Qatty jeldiń saldarynan órtti sóndirý qıynǵa soqty. Saǵat 21.53-te órt sóndirildi. Zardap shekkender joq. Órttiń shyǵý sebebi anyqtalyp jatyr. Órtti sóndirýge Aqmola oblysy Tótenshe jaǵdaılar departamentiniń 14 qyzmetkeri jáne 3 tehnıka, respýblıkalyq memlekettik mekemeniń 22 qyzmetkeri men 7 tehnıka jumyldyryldy», - dedi ol.
Vladımır Bekker sonymen birge Aqmola oblysynyń Býrabaı aýdanyndaǵy Qarajar aýylynan 5 shaqyrym jerde ashyq alańda 162 gektar jerge qurǵaq shóp, 18 gektar jerge bıdaı alqaby, sondaı-aq, Býrabaı» RMÝ aýmaǵyndaǵy 3 gektar orman qaldyǵy órtengenin jetkizdi.
«Saǵat 18:20-da órt oqshaýlandy. Zardap shekkender shekkender joq. Sebep anyqtalýda», - dedi Tótenshe jaǵdaılar komıtetiniń basshysy.
