TJK qyzmetkerleri sý basý qaýpinen ShQO-daǵy 128 úıdi qutqarýda
NUR-SULTAN. QazAqparat - QR Іshki ister mınıstrligi Tótenshe jaǵdaılar komıteti tóraǵasy Vladımır Bekker sý tasqyny boıynsha Shyǵys Qazaqstandaǵy Ertis jaǵasyndaǵy eldi mekenniń jaǵdaıyn baıan etti, dep habarlaıdy QazAqparat tilshisi.
«ShQO boıynsha: ol jaqta jaǵdaı turaqty. Dese de, kún jylyǵandyqtan Ertiske quıatyn shaǵyn sýlardyń deńgeıi artyp ketti. Sý qoımalaryndaǵy tolymdylyq deńgeıi jobalyq qýattylyqqa jetip qaldy. Ásirese, Shúlbi sý qoımasynda sýdy jiberý deńgeıin 700 tekshe metrge deıin arttyra bastady. Máselen, keshe ǵana bul san 1,1 myń tekshe metr bolǵan edi. Osynyń artynsha Ertis ózenindegi sý deńgeıiniń kóterilgeni baıqalady», - deıdi Vladımır Bekker vedomstvoda ótken brıfıngte.
Komıtet tóraǵasynyń aıtýynsha, seń Semeıden ótip, Ertispen aǵyp bara jatyr.
«Keshe jarý jumystary júrgizilgen bolatyn. Alaıda sonymen birge keshe saǵat 19.30 kezinde Krıvınka aýylynyń mańynda muz keptelisi paıda boldy. Ol muz búgin de aǵyp ketken joq. Munyń artynsha sý deńgeıiniń kóterilgeni baıqaldy. Osylaısha, aýyldy sý alý qaýpi bar. Ol aýyldaǵy 128 úıde 484 adam turady. Keshe ol jerde shtab quryldy. Aýdan ákimi sonda bardy. Ol jaqqa búgin oblystyq TJD-nyń bastyǵy jetti. Aýylda tikushaq pen qajetti tehnıkalar bar. Muz jarý jumystary kúni boıy júrgiziletin bolady. Osy keptelis joıylar degen oıdamyz», - deıdi Bekker.
Eske sala ketsek, buǵan deıin Besqaraǵaı aýdanynda Krıvınka aýylynan batysqa qaraı 6-7 shaqyrymda Ertiste muz keptelip, ózen arnasynan shyǵyp ketkenin habarlaǵan bolatynbyz.
Aıta keterligi, búgingi ótken baspasóz máslıhatynda QR Іshki ister mınıstrligi Tótenshe jaǵdaılar komıtetiniń tóraǵasy Vladımır Bekker Aqmola oblysyndaǵy tasqyn jaǵdaıy qandaı qaýip týdyryp turǵanyn aıtyp bergen edi. Onyń aıtýynsha, Atbasardaǵy bóget asa aýqymdy mólsherdegi sýdy ustap tur.
