TJK: Qazaqstanda 500-den astam gıdrotehnıkalyq nysandar jóndeý jumystaryn qajet etedi
ASTANA. QazAqparat - Qazaqstanda 500-den astam gıdrotehnıkalyq nysandar jóndeý jumystaryn qajet etedi. Bul týraly búgin Ortalyq kommýnıkatsııalar qyzmetindegi baspasóz máslıhatynda QR ІІM Tótenshe jaǵdaılar komıtetiniń tóraǵasy Vladımır Bekker málim etti.
«Jalpy, respýblıka boıynsha 1300-ge tarta gıdrotehnıkalyq nysandar bar. Olardyń jaǵdaıyn qadaǵalaý QR Aýyl sharýashylyǵy mınıstrliginiń quzyrynda. Bizdiń málimetter boıynsha búginde 500-den sál astam gıdrotehnıkalyq nysandar jóndeý jumystaryn qajet etedi», - dedi komıtet basshysy.
Bul rette ol jóndeýdi qajet etetin barlyq nysandar apattyq jaǵdaıda emes ekenin naqtylady.
V. Bekkerdiń sózine qaraǵanda, sý tasqynynyń aldyn alý maqsatynda óńirlerdegi gıdrotehnıkalyq nysandardy sýdan bosatý jumystary bastaldy.
«Tasqyn sýdy qabyldaýǵa qaýqarly bolýy úshin eki aptanyń ishinde birneshe sý qoımalaryn bosatý sharalary qabyldandy», - dedi ol.
