TJD ókili Jaıyq jaǵasyndaǵy keıbir turǵyndardyń nelikten evakýatsııadan bas tartyp jatqanyn aıtty

ASTANA. KAZINFORM – Batys Qazaqstan oblysy Tótenshe jaǵdaılar departamentiniń resmı ókili Nurjan Tóleýish  tasqynǵa baılanysty evakýatsııadan bas tartyp jatqan turǵyndar bar ekenin aıtty.

«Oblysqa Tótenshe jaǵdaılar mınıstrliginiń tapsyrmasymen qosymsha kúsh quraldary jiberilgen bolatyn. Olardyń basym bóligi kelip jetti, Oral qalasy men 4 aýdandaǵy jumystarǵa jumyldyryldy. Jaıyqtyń boıynda 84 eldik meken ornalasqan. Sol eldi mekenderge tónýi múmkin qaýip beti seıilgen joq. Osy eldi mekenderde Jaıyqtyń jaǵasyn kóterip, nyǵaıtý, bógetterdi qalyńdatyp, qumqap tóseý, halyqty qulaqtandyrý, úılerdi aralaý, ýaqytynan buryn evakýatsııalaý jumystary júrgizilip jatyr. Ótken táýlikte 61 adam evakýatsııalandy. Shaǵan ózeniniń boıyndaǵy «Stenovık» baýbaqsha seriktestiginde bógetten sý kirip ketken bolatyn. Sol sebepti shuǵyl túrde evakýatsııa jumystary júrgizildi», - dedi ol.

Nurjan Tóleýish turǵyndar arasynda tasqynnan qaýip keletinine senbeıtinder bar.

«Evakýatsııadan bas tartqan adamdar bar. Basty sebebi – olardyń senbeýi. Kóbinese sýdyń keletinine senbeıtinderin aıtyp jatyr. Biraq qazirgi jaǵdaıǵa baılanysty májbúrlep evakýatsııa jasaý jón dep oılaımyn. Óıtkeni sýdyń keletin deńgeıi áli de kóteriledi degen boljam bar. Qulaqtandyrý jumystaryna kelsek, ár eki saǵat saıyn tele, radıo arnalardan tikeleı habarlandyrý berip jatyrmyz. SMS arqyly, Instagram, Telegram jelisi arqyly, jergilikti BAQ arqyly da habarlap jatyrmyz. Qazirgi tańda 13 880 adam evakýatsııalandy. Onyń 2 300-i evakýatsııalyq pýnkterdi panalap júr», - dedi resmı ókil.