TJD qyzmetkerleri qar sýynyń qursaýynda qalǵandardy qutqardy - Qaraǵandy
QARAǴANDY. QazAqparat - Qaraǵandy oblysy TJD qutqarýshylary tikushaqtyń kómegimen erigen qar sýynyń qursaýynda qalyp qoıǵan Jańaarqa aýdanynyń bes turǵynyn qutqardy. Sondaı-aq, TJ departamentiniń qyzmetkerleri shalǵaıdaǵy aýylda shuǵyl kómekke muqtaj er adamdy medıtsınalyq mekemege jetkizdi, dep habarlaıdy QazAqparat tilshisi.
29 naýryz saǵat 10:00-de Jańaarqa aýdanynda Tselınnyı aýyldyq okrýginde erigen qar sýynyń saldarynan paıda bolǵan balshyqta 2 traktor turyp qalǵany týraly habarlama kelip tústi.
Oqıǵa ornyna Qaraǵandy oblysy TJD bólimsheleriniń qutqarýshylar toby jiberildi. Tasqyn sý deńgeıi joǵary bolǵandyqtan oqıǵa ornyna «Qazavıaqutqarý» AQ-nyń «Evrokopter-145» tikushaǵyn jumyldyrý týraly sheshim qabyldandy. Orynbaı aýylynan 19 shaqyrym jerde 5 adam tikushaq bortyna alynyp, Atasý kentine jetkizildi.
Dál osy kúni Abaı aýdanynda jedel medıtsınalyq járdem brıgadasy erigen qar sýynyń deńgeıin joǵary bolýyna baılanysty Alǵabas aýylynan kelip túsken shaqyrtýǵa jete almaıtyndyǵy týraly habarlama kelip túsken.
TJD qutqarýshylary «Trekol» jol talǵamaıtyn jermen júretin kólikpen medıtsınalyq qyzmetkerlermen birige otyryp, shuǵyl kómekti qajet etetin er adamdy medıtsınalyq mekemege jetkizdi.
Taǵy bir qutqarý operatsııasy Balqash óńirinde júrgizildi. Qaraǵandy oblysynyń TJD qutqarýshylary «Hıvýs» kater-amfıbııasymen 27 naýryzda Balqash kóline balyq aýlaýǵa shyǵyp, qaıtyp oralmaǵan er adamdy izdestirý jumystaryn júrgizdi. Er adam Balqash qalasynan ońtústikke qaraı 46 shaqyrym jerde, Aqqum-Jetiaral túbeginde tabyldy.
