TJD eskertýi: pırotehnıkany qalaı durys tańdaý kerek?
ASTANA. 14 jeltoqsan. QazAqparat - Endi kóp keshikpeı qala turǵyndary petardanyń, otshashýlar men salıýttardyń gúrsildep, jarylǵan daýsyn estıtin bolady. Jylda qalyptasqan dástúr boıynsha bizde jańa jyldy merekeleý 31 jeltoqsanǵa deıin bastalyp, kem degende qańtardyń ortasyna deıin sozylatyny bar. Pırotehnıkany qalaı durys tańdap, keıbir tosyn jaǵdaılardan aldyn ala qalaı saqtanýǵa bolatyny týraly Astana qalasynyń Tótenshe jaǵdaılar departamenti eskertedi, dep habarlaıdy elordanyń resmı saıty.
«Pırotehnıkany tek arnaıy dúkenderden satyp alǵan durys. Qorapshasyndaǵy barlyq jazýlary shyǵarylǵan fırmasy, shyǵarǵan jáne saqtalý merzimi tolyq kórsetilip, tek memlekettik jáne orys tilderinde jazylǵan bolýy qajet. Eń bastysy, buıymdy qalaı qaýipsiz paıdalanýy jóninde nusqama qosa tirkelýi qajet», - deıdi departamentte.
Pırotehnıkany paıdalaný kezinde qaýipsizdik sharalaryn mindetti túrde saqtaý kerek. «Salıýt atarda qurylystan alshaqtaý jerde ashyq alań bolýyn este ustaǵan jón. Al bengal shyraqtaryn paıdalanyp bolyp, qoqysqa tastarda onyń ústine mindetti túrde sý qoıýdy umytpaý kerek», - delingen taratylǵan habarlamada.
«Al shyrshaǵa qatysty aıtatyn bolsaq, olar tabıǵı bolsa da, jasandy bolsa da óte tez tutanady. Tabıǵı shyrshany sý quıyp sóndirý ońaı, jasandy shyrshany tutansa sóndirý kúrdelirek bolady. Sondyqtan bólmede jańajyldyq shyrshany bezendirýde mindetti túrde osyndaı saqtyq sharalaryn aldyn ala naqty oılastyrǵan jón. Qoryta aıtqanda, merekede barlyǵy da baqylaýda bolyp, qaýipsizdik saqtalýy kerek, - dep eskertedi TJD.
