TJD elordada kópqabatty ǵımarattan shyqqan órttiń sebebin jarııalady
NUR-SULTAN. QazAqparat – Elordada kópqabatty ǵımarattan shyqqan órt tolyq sóndirildi. Bul týraly Nur-Sultan qalalyq tótenshe jaǵdaılar departamentiniń baspasóz qyzmeti málim etti, dep habarlaıdy QazAqparat tilshisi.
«Órt sóndirýshiler oqıǵa ornyna kelip, Mırnyı 17 kóshesi boıyndaǵy sharýashylyq qurylysy, monsha jáne jeke úıdiń shatyry janyp jatqanyn anyqtady. Sonymen qatar órt jel áserinen Festıvalnyı kóshesinde ornalasqan kórshi úsh qabatty jeke úıdiń tóbesine kóshken. Órt 18:02-de tolyq sóndirildi. Órttiń aldyn ala sebebi otty qoldanýdaǵy salaqtyq», - dep habarlady Nur-Sultan qalalyq tótenshe jaǵdaılar departamentiniń baspasóz qyzmetinen.
Departament málimetinshe, qyzyl jalyn 400 sharshy metrdi sharpyǵan. Zardap shekkender men qaza tapqandar joq. Órt sóndirýge tótenshe jaǵdaılar bólimshelerinen 61 adam men 16 birlik tehnıka jumyldyrylǵan.
Eske sala keteıik, buǵan deıin elorda kópqabatty ǵımarat órtenip jatqany týraly habarlaǵan edik.
