TJD astanalyqtarǵa «jabaıy» jaǵajaılardyń qaýipti ekenin eskertti
ASTANA. KAZINFORM — Astanada shomylý maýsymy resmı túrde 1 maýsymda bastalyp, 31 tamyzǵa deıin jalǵasady, dep habarlaıdy Astana ákimdiginiń resmı saıty.
Sý aıdyndary, ásirese balalar men óz múmkindigin shamadan tys baǵalaıtyn adamdar úshin áli de eń qaýipti demalys oryndarynyń biri sanalady.
Qazir qala men onyń mańyndaǵy sý aıdyndaryndaǵy jaǵdaı turaqty, jyl basynan beri tótenshe jaǵdaılar tirkelgen joq. Qaıǵyly jaǵdaılardyń negizgi sebepteri — arnaıy jabdyqtalmaǵan oryndarda shomylý, qaýipsizdik erejelerin buzý jáne balalardy qaraýsyz qaldyrý.
— Astana qalasynda shomylýǵa ruqsat etilgen 5 oryn belgilengen. Olarǵa «Armına», «Stolıchnyı dvor», «Trı peskarıa» demalys aımaqtary, Ortalyq qalalyq jaǵajaı jáne kommýnaldyq jaǵajaı jatady. Jabdyqtalǵan jaǵajaılarda qutqarý beketteri, medıtsınalyq pýnkter, qutqarý qural-jabdyqtary, aqparattyq stendter, qalqymaly qorshaýlar, sondaı-aq azamattardyń qaýipsiz demalýy úshin qajet jaǵdaılar qarastyrylýy tıis, — dep habarlady Astana qalalyq TJD.
Alaıda, kóbisi áli kúnge deıin sý túbi tekserilmegen «jabaıy» jaǵajaılarǵa barǵandy jón kóredi. Onda sý astynda shyny, armatýra, qubyrlar, tastar jáne basqa da qaýipti zattar bolýy múmkin. Sonymen qatar, mundaı oryndarda qutqarý munaralary men medıtsınalyq kómek kórsetilmeıdi. Elordada shomylýǵa tyıym salynǵan barlyǵy 21 ýchaske belgilengen.
Qutqarýshylardyń aıtýynsha, mynadaı qatelikter jıi qaıtalanatynyn atap ótti: qalqymalardan asyp júzý, beıtanys jerlerde sýǵa sekirý, balalardy qaraýsyz qaldyrý jáne qaýipsizdik sharalaryn saqtamaı úrlemeli matrastardy nemese dóńgelekterdi paıdalaný. Bul rette kópshilik jeńqap kıgen nemese úrlemeli dóńgelekpen júrgen bala qaýipsiz bolady dep oılaıdy. Alaıda mundaı quraldar tolyq qorǵanysqa kepildik bermeıdi: olar aýdarylyp qalýy, aýasy shyǵyp ketýi nemese balany jaǵadan alystatyp áketýi múmkin.
Budan buryn Qostanaı qalasy mańyndaǵy sýǵa túsý bolmaıtyn oryndar anyqtalǵanyn jazdyq.
