TJD aptap ystyq kúnderi dala órtiniń aldyn alý sharalaryn eskertti
NUR-SULTAN. QazAqparat – Tótenshe jaǵdaılar departamentiniń ókilderi aptap ystyqqa baılanysty birqatar saqtyq sharalaryn eskertti. Bul týraly órt qaýipsizdigi sharalary jáne balalardyń terezeden qulaý faktileri boıynsha ótken onlaın brıfıngide aıtyldy, dep habarlaıdy QazAqparat tilshisi.
«Birinshiden, dala jáne ormandy jerde ystyq, qurǵaq, jeldi aýa raıy kezinde bolǵan jaǵdaıda ot jaǵýǵa bolmaıdy. Ekinshiden, saıajaıda jınalǵan qoqys pen qýraǵan shópti jaqqan kezde qaýipsiz araqashyqtyqty saqtaý kerek. Ol 50 metrdi quraıdy. Sonymen qatar, janǵan otty qaraýsyz qaldyrýǵa bolmaıdy jáne ony baqylaýdy balalarǵa tapsyrýǵa bolmaıdy. Janyp jatqan ot tolyq óshkenine kóz jetkizip alý kerek», - deıdi Nur-Sultan qalasy TJD basqarma bastyǵynyń mindetin atqarýshy Erkin Otarǵalymuly.
Onyń aıtýynsha, qalada birqatar shekteýler engizilgen. TJD qyzmetkeri halyq arasynda keń, aýqymdy túsindirý jumystaryn júrgizýde.
«Karantın rejımi birte-birte jeńildep kele jatyr. Osyǵan baılanysty turǵyndardyń tabıǵat aıasyna shyǵý faktileri úrdis alýda. Tabıǵat aıasyna barǵan kezde mindetti túrde qarapaıym qaýipsizdik erejelerin saqtaý kerek. Ot jaǵý kerek bolsa, onyń óshkenine kóz jetkizip alyńyzdar», - deıdi ol.
