TJD aptap ystyqqa baılanysty Almaty turǵyndaryna úndeý jasady
ALMATY. KAZINFORM – Almaty qalalyq Tótenshe jaǵdaılar departamenti Qazgıdrometke silteme jasap, aýa raıyna qatysty eskertý jarııalady.
Sınoptıkterdiń boljaýynsha, 17 mamyr kúni Almatyda synap baǵanasy 37 gradýsqa deıin kóterilip, kún qatty ystyq bolady.
Osyǵan baılanysty Tótenshe jaǵdaılar departamenti mynandaı qaýipsizdik sharalaryn saqtaýdy usynady:
– taýǵa demalýǵa barǵanda ashyq ot jaqpaýdy, tutanǵan temeki qaldyqtaryn tastamaýdy suraımyz;
– bir jelige birneshe elektr qurylǵylardy qospańyz, óıtkeni elektr jelisiniń shamadan tys júktelýi qysqa tuıyqtalýǵa jáne órtke ákelýi múmkin;
– balalardy kóliktiń ishine az ýaqytqa bolsa da qaldyrmańyz;
– qala turǵyndary men qonaqtaryn kún sáýlesinen qorǵaný úshin serýendeýden bas tartýǵa shaqyrdy.
Osyǵan deıin Ekologııa jáne tabıǵı resýrstar mınıstri Erlan Nysanbaev Úkimet otyrysynda jaz aılaryna arnalǵan aýa raıy boljamyn aıtqan bolatyn.