TJD: Almatyda sý tasqynymen baılanysty jaǵdaı kúrdeli
ALMATY. QazAqparat - Almaty TJD bastyǵy Serik Áýbákirov qalanyń sý tasqynyna daıyndyǵy týraly aıtty, dep habarlaıdy «QazAqparat» HAA tilshisi.
Ol keltirgen derekter boıynsha, 27 sáýir kúni qalada ortasha táýliktik norma bes esege artty.
«Munyń bári ózendegi sý deńgeıiniń kóterilýine ákep soqtyrdy. Biz sý tasqynynyń tolassyz jaýǵan nóser saldarynan oryn alǵanyn baıqadyq. Orlar paıda bolyp, qalanyń joǵarǵy jaǵyn sý aldy. Tún ortasynda qalanyń tómengi bóligi - negizinen Naýryzbaı, Alataý aýdandary sý astynda qaldy», - dedi Áýbákirov.
Qalalyq TJD bastyǵy atap ótkendeı, aýlalardy, úılerdi, keıbir jertólelerdi sý basqany týraly 60 habarlama kelip tústi. Jeke quramnan 369 adam, 55 sý aıdaıtyn tehnıka jumyldyryldy.
«27 aýla men 11 aýmaqty sý aldy. Evakýatsııa jergilikti, bizdegi úıler samannan turǵyylǵan. Dymqyldana bastaǵanda, qulaıdy.
Qabyrǵalary qısaıyp, opyryla bastaıdy. Adamdardan ǵımaratty bosatýyn suraımyz. Alataý aýdanyndaǵy Aqbulaqta qıraǵan ǵımarat bar. Bul adamdar týystaryna ornalastyryldy. Evakýatsııalaý qajet bolmady», - dep habarlady Áýbákirov.
«Meniń oıymsha, jaǵdaı qıyn bolyp tur. Búginde aýmaqtyq júıe, qosalqy júıe tabıǵı apatty joıýǵa daıyn. Biz joǵary daıyndyq rejımindemiz, qor da bar. Qaptar daıyndaldy. Ulttyq gvardııany jumyldyramyz. Kez kelgen jaǵdaıǵa daıynbyz», - dep qorytyndylady TJD bastyǵy.
