TJD: Almaty mańyndaǵy taý ózenderinde sý deńgeıi ózgerýi múmkin
ALMATY. QazAqparat - Almaty tótenshe jaǵdaılar departamenti «Qazgıdromet» RMK daýyldy eskertýi negizinde almatylyqtarǵa úndeý joldady, dep habarlaıdy QazAqparat tilshisi.
«Taıaýdaǵy eki táýlikte, ıaǵnı 12-13 tamyzda jańbyrly kún raıyna baılanysty Almaty oblysy taýlarynda ózender sýy tasýy yqtımal. Selden qaýip joq»,-dedi qalalyq TJD baspasóz qyzmetinen.
TJD málimetinshe, bıyl buzylý qaýpi bar 9 morena kólderin bosatý boıynsha aldyn alý sharalary júrgizilýde. Sharaǵa 120 adam men 3 shaǵyn ekskavator jumyldyrylǵan. Morena kólderin bosatý úshin sıfon qubyrlary men sý soratyn joǵarǵy ónimdi sorǵylar qoldanylady. Morena kólderin kúndiz-túni baqylaý úshin 20 gıdrobeket qoıylǵan.
9 kóldi tazalaý bastalǵannan beri 3 mln 200 myń tekshe metr sý alynǵan. Kóldegi sý deńgeıi 1-den 4,5 metrge deıin tómendegen.
Sel ahýalyn qalalyq ákimdik pen TJD qadaǵalap otyr.
