TJD Almaty aýasynyń shekten tys lastanǵanyn joqqa shyǵardy
ALMATY. QazAqparat - Almaty qalasynyń Tótenshe jaǵdaılar departamenti qoqys polıgonyndaǵy órt saldarynan shahardyń aýasy shekten tys lastanǵany týraly aqparattyń shyndyqqa janaspaıtynyn aıtty, dep habarlaıdy QazAqparat tilshisi.
«Messendjerler arqyly Almatynyń aýasynda kúkirt dıoksıdiniń kólemi qalyptan 70 ese artqany týraly feık jańalyqtar tarady. «Qazgıdromet» mekemesiniń málimetine súıene otyryp, aýanyń zııandy zattarmen lastanbaǵanyn habarlaımyz. Almaty qalalyq Tótenshe jaǵdaılar departamenti kóshede respıratorlar men gazǵa qarsy tumyldyryq kıip júrý kerektigi týraly keńes bergen joq. Dál qazir Qarasaı aýdanyndaǵy órt aýyzdyqtalýda. Turǵyndardy sabyr saqtaýǵa shaqyramyz» - delingen resmı aqparatta.
Departamenttiń habarlaýynsha, órt sóndirýshi kólikterdiń qyzyl jalynǵa jaqyndap barýy qıynǵa soǵýda. Tereńdigi 60-70 metr bolatyn saıdy eńserý múmkin bolmaı tur.
Buǵan deıin almatylyqtar qala aspanyn qoıý tútin basqanyna shaǵymdanǵan bolatyn.
