TJ rejımi: SQO túrmeleri týystarmen kórisýdi onlaın uıymdastyrdy
PETROPAVL. QazAqparat – Tótenshe jaǵdaıǵa baılanysty engizilgen shekteýlerge oraı Soltústik Qazaqstan oblysynyń kolonııalarynda týystarmen kórisý onlaın-formatta ótti, dep habarlaıdy QazAqparat tilshisi.
SQO qylmystyq-atqarý júıesi departamenti baspasóz qyzmetiniń málimetinshe, jazasyn óteýshiler jaqyndarymen «Skype» arqyly beınebaılanysqa shyqqan. Óńirdegi túzetý mekemeleri mundaı beınebaılanysty alǵash uıymdastyryp otyr.
«Qylmys jasaǵandar sottyń úkimimen bas bostandyǵynan aıyrylady, biraq syrtqy álemmen baılanysy tolyǵymen kesilmeıdi. Sottalǵannyń jaqyn adamdarymen habarlasyp, kórisip turýyna quqyǵy bar. Eki aıda bir ret eki saǵattyq qysqa kezdesý jáne eki táýliktik uzaq kezdesý alady. Hat jaza alady, telefon arqyly qońyraý shalýǵa ruqsat bar. Biraq, mundaı kezdesýler jazasyn óteýshiniń tártibine jáne basqa faktorlarǵa qaraı beriledi», - deıdi SQO boıynsha QAJD bastyǵy Rýstan Ahmetjanov.
ES-164/1,3,6,8,9 mekemelerinde SQO boıynsha QAJD sottalǵandar úshin olardyń týǵan-týystarymen «Skype» arqyly beınekezdesý uıymdastyrdy. Petropavldaǵy áıelder kolonııasynda 200-den astam adam jazasyn ótep jatyr. Olardyń arasynda adam qanyn moınyna júktegender de, esirtki saýdasymen aınalysqandar da bar. Biraq negizinen urlyq jasap, alaıaqtyqpen aınalysqandar otyr. Búgin qysqa merzimdi kezdesýge ýaqyty jetken alty áıel týǵandaryn qashyqtan kórip, sóılesýge múmkindik aldy.
Jalpy bul kúni bes túzetý mekemesiniń 18 sottalýshysy beınebaılanysqa shyǵyp, maýqyn basty.
«Men ata-anamdy kórýge múmkindik aldym jáne balalarymdy kórip qýanyp qaldym. Olar meniń denim saý ekenin kóre aldy. Mekeme ákimshiligine osyndaı múmkindik bergeni úshin úlken rahmet», - deıdi SQO boıynsha QAJD ES-164/6 mekemesiniń sottalýshysy O. Shavkomýd.
Mamandardyń aıtýynsha, beıneqońyraýlar elde koronavırýstyń taralý qaýpin azaıtýǵa múmkindik beredi, sondaı-aq ol arqyly eki jaq bir-birin kóre alady.
«Jazasyn ótep jatqan týǵanyn kórý úshin júzdegen, keıde myńdaǵan shaqyrymdy artqa tastaýdyń, shyǵyndanýdyń da qajeti joq. Elimizdiń shalǵaı aımaqtarynda turatyndar osyndaı beınekezdesýler arqyly jaqyndaryna qoldaý kórsete alady. Sottalǵandar áleýmettik paıdaly baılanystardan qol úzbeıdi jáne olardyń psıhologııalyq jaǵdaıyna oń áser etedi», - deıdi SQO boıynsha QAJD ES-164/3 mekemesiniń bastyǵy Tamerlan Valıev.
