TJ mınıstrligi sý aıdyndaryndaǵy qaýipsizdik qaǵıdasyn bekitýdi josparlaýda
ASTANA. QazAqparat - QR Tótenshe jaǵdaılar mınıstrligi sý aıdyndaryndaǵy qaýipsizdik qaǵıdasyn bekitýdi josparlaýda. Bul týraly búgin brıfıngte QR Tótenshe jaǵdaılar mınıstrliginiń resmı ókili Rýslan Imanqulov málim etti.
"Jaqynda Tótenshe jaǵdaılar mınıstrligi sý aıdyndaryndaǵy qaýipsizdik qaǵıdasyn Úkimet qaýlysymen bekitýdi josparlaýda. Atalmysh qaǵıda sý aıdyndaryn demalý, týrızm men sporttyq maqsatta paıdalaný tártibin anyqtaıdy, sýda jáne muz ústindegi qaýipsizdik sharalary men demalýshylardyń jaýapkershiligin belgileıdi, sondaı-aq qaýipsizdik qaǵıdalary men sharalaryn buzǵan uıymdar (jaǵajaılar, demalý oryndary jáne t.b) men azamattarǵa aıyppuldar qarastyrylady", - deıdi ol.
Sońǵy jyldary TJ mınıstrligi sý aıdyndardaǵy oqys oqıǵalardyń aldyn alý boıynsha profılaktıkalyq jumysqa úlken mán berýde. Alaıda, statıstıka azamattardyń barlyǵy birdeı qutqarýshylardyń keńesterine qulaq aspaıtynyn kórsetip otyr. Aǵymdaǵy jyldyń basynan bastap elimizdiń sý aıdyndarynda 87 adam (onyń ishinde 17-si bala) sýǵa ketti, ol 2013 jyldyń 5 aıyna qaraǵanda 30 adamǵa kóp (2013 jyly 57 adam sýǵa ketti, onyń ishinde 13-i bala). Sonymen birge, sýda qutqarý qyzmeti 160 adam men 10 balany qutqardy. Kóp jaǵdaıda adamdardyń qaza bolýy balyq aýlaý kezindegi qaýipsizdik qaǵıdasyn buzýshylyq saldarynan oryn alady (38 adam).
Tek ótken jylǵy sýǵa shomylý maýsymynda 303 adam, onyń ishinde 48 bala sýǵa ketti. Aǵymdaǵy jylǵy 5 aıda eń kóp sýǵa ketkenderdiń sany Ońtústik Qazaqstan oblysynyń sý aıdyndarynda 13 adam, Almaty oblysynda - 10 adam, Jambyl oblysynda - 9 adam.
