Kostenko shahtasynda buǵan deıin qandaı buzýshylyqtar anyqtalǵan

Sońǵy ret Kostenko shahtasyndaǵy tótenshe jaǵdaı 2018 jyly boldy. Onda adam shyǵyny bolǵan joq. Tótenshe jaǵdaı mınıstri Syrym Sháriphanov buǵan deıin shahtada qandaı buzýshylyqtar anyqtalǵanyn jáne qalaı joıylǵanyn aıtty, dep habarlaıdy Kazinform tilshisi.

«Bul shahtada sońǵy ret 2018 jyly órt bolǵan. Ol kezde kóz jumǵan jáne zardap shekkender bolǵan joq. Bizdiń bilýimizshe, tekserý jumystary áli júrip jatyr. ıAǵnı, Ónerkásip qaýipsizdigi departamenti tarapynan josparly tekserý júrgizilýde», - dedi oblys ákimi Ermaǵanbet Bólekpaev Óńirlik kommýnıkatsııalar qyzmetindegi brıfıngide. 

Belgili bolǵandaı, qaıǵyly oqıǵa kezinde tıisti organdar shahtany teksergen. Bul jumystar 30 qazanda aıaqtalýy kerek edi. Aldyńǵy monıtorıng boıynsha 212 buzýshylyq tabylǵan.

«Tekserý 9 qazanda bastalyp, 30 qazanǵa deıin jalǵasady. Ótken jyly da tekserý boldy. Onda 171 nysan tekserilip, 212 buzýshylyq anyqtaldy. Olardyń bireýinen basqasynyń bári túzetildi. Bul kemshilikter qazirgi tótenshe jaǵdaıǵa ákeldi me, joq pa, aıtý qıyn. Sebebi memlekettik komıssııa, tıisti saraptamalar júrgizý qajet. Osy saraptamalardyń nátıjeleri boıynsha ǵana osy apatqa ne sebep bolǵany týraly qorytyndy jasaýǵa bolady», - dep tolyqtyrdy Syrym Sháriphanov.

Ótken jyly negizgi buzýshylyqtar tiziminde birneshe tarmaq bolǵan.

«Ótken jyly anyqtalǵan buzýshylyqtar ishinde tehnıkalyq qurylǵylardyń qyzmet etý merzimi ótkeni, óndiristik ǵımarattar men tehnologııalyq qurylystardy tekserý jáne dıagnostıkalaý júrgizilmegeni, memlekettik ınspektsııa qatysýymen qaýipti tehnıkalyq qurylǵylardy paıdalanýǵa berý aktileri usynylmaǵany, qazbalardy jeldetýdi jaqsartý jónindegi is-sharalar oryndalmaǵany, óndiristik baqylaý deńgeıi buzylǵany bar edi. Bul eń negizgi sebep. Gaz deńgeıin únemi qadaǵalap otyrý kerek, tútin deńgeıin baqylaý kerek. Ol úshin tıisti sharalar qabyldaý qajet. Bul jumystardyń barlyǵy sapaly júrgizilgen joq», - dep tolyqtyrdy TJ mınıstri.

Aıta keteıik, S.Sháriphanov brıfıng barysynda, sondaı-aq jer astynda qalǵan 13 kenshini aman tabýǵa úmit az ekendigin aıtqan bolatyn. 

Eske salaıyq, búgin túnde Qaraǵandy oblysyndaǵy Kostenko atyndaǵy shahtada órt boldy. Saǵat 17.33-tegi málimet boıynsha 33 kenshiniń denesi tabyldy,13 adam izdestirilip jatyr. 20 jumysshy aýrýhanaǵa jetkizildi.

Kásibı áskerılendirilgen apattyq-qutqarý qyzmetteriniń respýblıkalyq ortalyq shtaby Qaraǵandy fılıaly dırektorynyń orynbasary Jumat Ókenov mert bolǵan kenshilerdiń jeke basyn anyqtaý qıynǵa túsip jatqanyn aıtty.

29 qazan Jalpyulttyq aza tutý kúni bolyp jarııalandy. Memleket basshysy Qasym-Jomart Toqaev Úkimetke «ArselorMıttalTemirtaý» kompanııasymen ınvestıtsııalyq yntymaqtastyqty toqtatý týraly tapsyrma berdi. Keıin Úkimettiń baspasóz qyzmeti «ArselorMıttal Temirtaý» AQ-nyń menshik quqyǵyn QR menshigine qaıtarý týraly kelisimsharttyń aıaqtalýǵa jaqyn ekenin málim etti.

Apatqa baılanysty Reseı, Belarýs, Qyrǵyzstan, Frantsııa, Ózbekstan prezıdentteri men Túrkııa Syrtqy ister mınıstrligi kóńil aıtty.

Kazinform «ArselorMıttalTemirtaý» tarıhynda qandaı apattar bolǵanyna sholý jasaǵan bolatyn.