TJ komıteti Tuzdybastaýdaǵy órttiń sebep-saldaryn jarııa etti
ASTANA. QazAqparat - QR ІІM Tótenshe jaǵdaılar komıteti Almaty oblysy Talǵar aýdanynyń Tuzdybastaý aýylyndaǵy órt hronıkasyn jarııalady, dep habarlaıdy «QazAqparat» HAA tilshisi.
Komıtettiń habarlaýynsha, 2017 jyly 27 shildede 22 saǵat 10 mınýtta Talǵar aýdanynyń Tuzdybastaý aýylyndaǵy úıdiń órtenýi týraly habar kelip túsken. 22 saǵat 11 mınýtta Talǵar qalasynyń ekinshi arnaıy mamandandyrylǵan órt bóliminiń eki bólimshesi jolǵa shyqty jáne keıinirek kúsh-quraldar taǵy da kóbeıtildi.
TJ komıtetiniń resmı ókili Rýslan Imanqulov Talǵar trassasyndaǵy kólikterdiń kóptigi órt bólimsheleriniń oqıǵa ornyna jyldam barýyna kedergi keltirgenin atap ótti.
«Talǵar trassasyndaǵy kólikterdiń kóptiginen jáne jaqyn órt bóliminiń 20 shaqyrym jerde ornalasýynan órt sóndirýshiler oqıǵa ornyna 22 saǵat 45 mınýtta jetti. Órt ornyna kelgende jıhaz tsehynyń, eki turǵyn úıdiń jáne eki jazǵy turaqtyń órtenip jatqany anyqtaldy. Tilsiz jaýdyń jaqyn turǵan taǵy úsh úıge aýysýyna jol berilmedi. Órttiń tutaný sebebin anyqtaý úshin Almaty oblysy TJ departamentiniń órt zerthanasynyń mamandary jiberildi. Órttiń taralýyna órt bólimsheleriniń aıtarlyqtaı uzaq qashyqtyqta ornalasýy jáne baspanalardyń tez janatyn materıaldardan (aǵash, qamys) turǵyzylýy sebep bolǵan», - dedi ol.
Órtti sóndirýge Almaty qalasynyń arnaıy bólimderi de jumyldyrylǵan. Birlesip kúsh salý nátıjesinde, 470 sharshy metr aýmaqqa taraǵan órt 00 saǵat 24 mınýtta aýyzdyqtaldy jáne 01 saǵat 16 mınýtta tolyq sóndirildi.
«Syn aıtatyndar mindetti túrde tabylady. Olarǵa aıtarym - órt sóndirýshiler eshqashan sýsyz kelmeıdi, sýdyń taýsylyp qalatyn sátteri de bolady. Keshegi órtte árbir órt avtotsısternasyndaǵy sý 7-10 mınýtta taýsylyp qaldy. Sondyqtan, úzdiksiz sýmen qamtamasyz etý maqsatynda kommýnaldyq qyzmetiń sý tasýshy kólikteri shaqyryldy», - dep tolyqtyrdy R.Imanqulov.
Órttiń saldarynan eki qamystan salynǵan turǵyn úı jáne samannan salynǵan jazǵy turaq órtke oranǵan, ekinshi jazǵy turaqtyń 35 sharshy metr bolatyn shatyry janyp ketken. Aýmaǵy 200 sharshy metr bolatyn jıhaz tsehynyń múlikteri men shatyry jáne ÝAZ avtokóligi órtengen.
Órtten eshkim zardap shekken joq.
