TJ kezinde qutqarýshylarǵa úsh eselengen ótemaqy beriledi – Jańa zańnyń normalary qandaı
ASTANA. KAZINFORM – Senat «QR keıbir zańnamalyq aktilerine azamattyq qorǵaý, elektr energetıkasy jáne memlekettik múlikti basqarý máseleleri boıynsha ózgerister men tolyqtyrýlar engizý týraly» zańdy ekinshi oqylymda maquldady.
Halyqaralyq qatynastar, qorǵanys jáne qaýipsizdik komıtetiniń múshesi Sergeı Ershovtyń aıtýynsha, bul zań azamattyq qorǵaý júıesiniń qaýipsizdigin qamtamasyz etý tetikterin jetildirý, tıimdiligin arttyrý, tótenshe jaǵdaılardyń aldyn alý jáne olardy joıýmen aınalysatyn qyzmetkerlerge áleýmettik qoldaý sharalaryn engizý maqsatynda ázirlengen. Sondaı-aq, qujatta elektr energetıkasy jáne memlekettik múlikti basqarý salalaryn retteý de qamtylǵan. Atalǵan ózgerister 10 kodekske jáne 37 zańǵa engiziledi.
− Eń aldymen, eldiń qaýipsizdik deńgeıin arttyrý úshin órt qaýipsizdigi men ónerkásiptik qaýipsizdik sharalary kúsheıtilgenin atap ótkim keledi. Máselen, adam kóp jınalatyn nysandar, bıiktigi 28 metrden asatyn kópqabatty turǵyn úıler paıdalanýǵa beriler aldynda órt qaýipsizdigi talaptaryna sáıkestigi jóninde qorytyndy alý tártibi engiziledi. Bul atalǵan sanattaǵy nysandarda buzýshylyqtardyń aldyn alýǵa jáne azamattar úshin yqtımal qaýip-qaterdi azaıtýǵa múmkindik beredi, − dedi S.Ershov Senattyń búgingi otyrysynda.
Ónerkásiptik qaýipsizdik deńgeıin arttyrý úshin Tótenshe jaǵdaılar mınıstrligine qaýipti óndiristik nysandardy jańartý jáne tehnıkalyq qaıta jaraqtandyrýdyń Jıyntyq josparyn maquldaý fýnktsııasy beriledi. Sondaı-aq, nysan ıelerine bul jospardy ýaqytyly oryndaý mindeti júkteledi. Bul shara obektilerdi qaıta jaraqtandyrý barysyn ishinara baqylaýǵa múmkindik beredi.
Kásibı avarııalyq-qutqarý qyzmetterine qoıylatyn talaptar da kúsheıtildi. Atap aıtqanda, bul qyzmetterde arnaıy tehnıka, apparatýra jáne jabdyqtar menshik quqyǵynda bolýy kerek. Oǵan qosa, ónerkásiptik qaýipsizdik salasyndaǵy kásibı avarııalyq-qutqarý qyzmetterin attestattaýdyń bólek tártibi engiziledi. Bul týyndaǵan qaýip-qaterge jedel den qoıýǵa jáne qyzmetterdiń áreket etý daıyndyǵyn arttyrýǵa múmkindik beredi.
− Azamattyq qorǵaý organdary qyzmetkerleriniń áleýmettik mártebesin arttyrýǵa baǵyttalǵan túzetýler bóligin jeke atap ótkim keledi. Atap aıtqanda, qyzmetkerler men olardyń otbasylaryna turǵyn úı járdemaqysy, kóterme tólemder jáne jeke múlkin kóshirý shyǵyndaryn óteý qarastyrylǵan. Sondaı-aq, áskerı nemese tótenshe jaǵdaı kezinde, terrorızmge qarsy operatsııalar nemese tótenshe jaǵdaı jarııalanǵan aýmaqta apattyq-qutqarý jumystaryn júrgizý kezinde qyzmetkerlerge úsh ese mólsherde aqshalaı ótemaqy tóleý kózdelgen, − dep túsindirdi depýtat.
Eńbek qatynastarynda turmaǵan erikti órt sóndirýshiler úshin de jeńildikter belgilendi. Mysaly, ómirden ótken jaǵdaıda, múgedektikke ushyraǵanda, aýyr jaraqat, kontýzııa, jaralaný nemese eńbekke jaramsyzdyqqa ákep soqqan aýrýlar kezinde eń tómengi jalaqy mólsherimen birdeı tólemder qarastyrylǵan. Keleshekte bul sharalar erikti órt sóndirýshilerdiń quqyqtary men áleýmettik kepildikterin qorǵaýǵa negiz bolmaq.
Seısmıkalyq qaýipsizdikti qamtamasyz etý sharalary da kúsheıtildi. Bul baǵytta QR TJM tótenshe jaǵdaılardyń aldyn alý boıynsha ortalyq memlekettik organdar men ákimdikterge eskertý boıynsha baqylaý fýnktsııasyn alady.
Zańda elektr energetıkasy jáne memlekettik múlikti basqarý salalaryna qatysty normalar da qarastyrylǵan. 2029 jylǵa deıin elektr energetıkasy salasyn damytý tujyrymdamasy bekitilgen.
Elektr qýatyn qoldaýǵa baǵyttalǵan qyzmetter boıynsha jekelegen tarıfterge ındeksatsııa qarastyrylǵan. Bul, ásirese jańadan iske qosylatyn elektr stantsııalaryna qatysty. Mundaı sharalar valıýta jáne qarjy táýekelderin tómendetýge jáne ınvestıtsııa úshin qolaıly jaǵdaı jasaýǵa múmkindik beredi.
− Kvazımemlekettik sektordy basqarýdy, sonyń ishinde jekeshelendirýdi jetildirý maqsatynda tıisti sharalar qabyldaý qajettigi týyndady. Qazirgi tájirıbede nysandardy baǵalaý qunynan tómen baǵada satý, affılıırlengen tulǵalarǵa berý sııaqty faktiler anyqtalǵan. Osyǵan baılanysty, básekesiz satý tásilderin alyp tastaý jáne naryq qunynan tómen baǵada satý múmkindigin boldyrmaý jónindegi túzetýler engiziledi, − dedi S.Ershov.
Sonymen birge, zańnyń ekinshi oqylymynda memlekettik materıaldyq rezerv júıesin ortalyqsyzdandyrý, ónerkásip qaýipsizdigindegi baqylaýdy kúsheıtý, azamattyq qorǵanysqa qurylystaryn mindetti túrde memlekettik tirkeýge alý, seısmologııalyq baqylaý jelilerin jáne erte eskertý júıelerin keńeıtý men jańǵyrtý usynyldy.
Órt saldarynan úshinshi tulǵalarǵa zııan keltirilgen jaǵdaıda, adam kóp jınalatyn nysan ıeleriniń azamattyq-quqyqtyq jaýapkershiligin mindetti túrde saqtandyrý talap etiledi.
Aıta keteıik, Tótenshe jaǵdaılar mınıstrligi 16 myńǵa jýyq obektiniń órt jáne ónerkásiptik qaýipsizdigin tekserip, 100 myńnan astam buzýshylyqty anyqtaǵan. Qaýipsizdik talaptary buzylyp, jumysy toqtaǵan kásiporyndar 4,5 ese ulǵaıǵan.