TJ departamenti qaýipsizdikti saqtamaǵan «Haıvıldy» jyl basynda jazalaǵan
ASTANA. QazAqparat - Jyl basynda Astana qalasy Tótenshe jaǵdaılar departamenti «Haıvıl» turǵyn úı keshenine josparly tekserý jumystaryn júrgizgen jáne órt qaýipsizdigi boıynsha birqatar eskertýler jasaǵan, dep habarlaıdy «QazAqparat» HAA tilshisi.
«Keıbir kemshilikter boıynsha ákimshilik jaýapkershilikke tartqanbyz. Atap aıtqanda, jertólede qoqys (synyq oryndyqtar men ústelder) jatty, oram ishinde júretin jolmen qamtýdy jáne órt gıdrantyn qystan keıin eritýdi talap ettik», - dedi Astana qalasy Tótenshe jaǵdaılar departamentiniń bastyǵy, azamattyq qorǵaý polkovnıgi Barat Duzaqbaev ákimdikte ótken brıfıngte.
Ol adam ómirine qaýpi joǵary nysandardy qospaǵanda, ózge nysandardy jospardan tys tekserýge zań boıynsha tyıym salynǵanyn eske saldy.
«Shaǵyn jáne orta bıznesti múldem tekserip jatqan joqpyz. Biraq adam ólimi oryn alsa, turǵyn úı ınspektsııasymen jáne TShK tóraǵasymen birlesip, túsindirme jumystaryn júrgizemiz. Olarǵa qaı talaptardy oryndaý qajettigin túsindiremiz. (...) Haıvılde salqyndatqysh qysqa tuıyqtalyp qalǵan. Bul másele boıynsha turǵyn úı kireberisterin qaıtadan tekserý men elektrmen qamtamasyz etý, salqyndatqysh sekildi qondyrǵylardyń tehnologııalyq talaptaryna túsken júktemeni tekserý jóninde usynymdar berdik», - deıdi Astana TJD basshysy.
Onyń aıtýynsha, birneshe adam qaza tapqan qaıǵyly oqıǵada órt avtomatıkasy júıesi dabyl qaqqan, biraq qaza tapqandar órt dabylyn estimegen nemese oǵan deıin ıis tıip, kóz jumǵan.
Eske sala ketsek, 14 shilde kúni «Haıvıl» turǵyn úı kesheniniń D blogyndaǵy páterden órt shyǵyp, 4 adam qurban boldy. Keıinirek, Astana ІІD qurban bolǵandar - 1953 jyly týǵan Nıgerııa azamaty, onyń zaıyby - 1963 jyly týǵan Ulybrıtanııa azamatshasy, 8 jáne 17 jastaǵy kámeletke tolmaǵan balalar ekeni anyqtady. Er adam Nazarbaev Ýnıversıtetiniń qyzmetkeri bolǵan. Aldyn ala boljam boıynsha, órt jelilerdiń tuıyqtalýynan tutanǵan.
Keshe balkondardyń birinde kondıtsıoner qysqa tuıyqtaldy, alaıda qurylǵy órtenbedi.
6 shilde kúni de «Haıvıl» turǵyn úı kesheniniń A blogyndaǵy ǵımarattardyń biri órtengen. Tilsiz jaýdy 17 dana tehnıka men 35 adam 20 mınýtta sóndirgen edi. Qaza tapqandar men zardap shekkender bolǵan joq.
Al 19 aqpan kúni turǵyn úı keshenindegi órtten 150 adam, onyń ishinde 50 bala evakýatsııalandy. Bir adam órt tútininen zardap shekti. Oqıǵa ornynda 8 tehnıka men astanalyq órt sóndirý qyzmetiniń jeke quramynan 35 adam jáne «102» polıtsııa qyzmeti men «103» qyzmetiniń brıgadasy jumyldyryldy.
«Haıvıl» keshenindegi qaıǵyly órtti qospaǵanda, Astana aýmaǵynda birinshi jartyjyldyqta 387 órt bolǵan. Bul ótken jyldyń alǵashqy alty aıymen salystyrǵanda, 12%-ǵa kóbirek. Byltyr tilsiz jaýdan 9 adam mert bolsa, bıyl bir ǵana adam qaza tapqan. Órtten kelgen materıaldyq shyǵyndardyń jalpy kólemi 64 mln 387 teńgeni qurady jáne 408 mln teńgeden asatyn materıaldyq qundylyqtar qutqaryldy. Órt jaǵdaılarynyń basym bóligi avtokólik pen turǵyn úı sektorlarynda bolǵan.
