Tyıym salynǵan jerge sýǵa túsken aqtóbelikter jaýapkershilikke tartylýda
AQTÓBE. QazAqparat - Aqtóbede jazdyń ystyǵynda ózen jaǵasyndaǵy qaıǵyly oqıǵanyń aldyn alý úshin jergilikti ákimdik pen tótenshe jaǵdaılar qyzmeti, polıtsııa reıdke shyqty. Ózenderdiń tyıym salynǵan aýmaǵyna shomylǵan aqtóbelikter ákimshilik jaýapkershilikke tartylyp jatyr, dep habarlaıdy QazAqparat tilshisi.
Aqtóbe qalasy men aýdandarda osynyń saldarynan qaza tapqan adamdar sany 5-ke jetti. Buǵan deıin habarlaǵanymyzdaı, taıaýda belgilenbegen jerge sýǵa shomylǵan 24 jastaǵy qyzdyń denesi bir kúnnen soń tabyldy.
«Qala aýmaǵyndaǵy ózenderde qaıǵyly jaǵdaıdyń aldyn alý maqsatynda jumys toby reıd júrgizdi. Onyń quramyna Aqtóbe qalasynyń tótenshe jaǵdaılar basqarmasy, jergilikti polıtsııa, TJD jedel qutqarý jasaǵy qyzmetkerleri kirdi. Reıd nətıjesi boıynsha tyıym salynǵan oryndarda sýǵa shomylǵan 5 azamatqa QR Ákimshilik quqyq buzýshylyq týraly kodeksiniń «Ortaq sý paıdalaný qaǵıdalaryn buzý» baby 1-tarmaǵyna sáıkes hattamalar toltyrylyp, eskertý berildi»,- dep habarlady Aqtóbe qalasy ákiminiń baspasóz qyzmeti. Eger eskertý alǵan adamdar qaıta tyıym salynǵan jerge shomylsa, 2 AEK kóleminde aıyppul tóleıdi.
Aıta keteıik, qala əkimi І.Ispanovtyń tapsyrmasymen qalalyq kásipkerlik, jumyspen qamtý, salyq jəne tótenshe jaǵdaı basqarmalary basshylarynyń qatysýymen qalalyq jaǵajaılar qyzmeti tekserildi. Qalada barlyǵy 14 jaǵajaı bar, onyń ekeýi kommýnaldyq. Jaǵajaılarǵa kirý baǵasy ortasha eseppen 200-700 teńge aralyǵynda bolsa, kommýnaldyq jaǵajaılarǵa kirý tegin. Tekserý kezinde jaǵajaılarda qutqarýshylardyń qaıyǵy joq ekeni jáne olardyń arnaıy keýdeshe kımegeni anyqtaldy. Kassalyq apparattar qoldanylmaıdy, qyzmetkerler kelisimshartsyz jumys istep júr. Jaǵajaı qyzmeti talaptaryn buzǵan kásipkerlerge uıǵarym berilip, kemshilikterdi joıý mindetteldi.
