Tyıym salynǵan oryndarda temeki tartqan 25 myńnan astam adamǵa aıyppul salyndy - ІІM
ASTANA. 6 qarasha. QazAqparat - Aǵymdaǵy jyl basynan beri tyıym salynǵan oryndarda temeki tartqany úshin 25 myńnan astam azamatqa, sonymen qatar kámelettik jasqa tolmaǵandarǵa temeki satqany úshin 1 myńǵa tarta adamqa aıyppul salyndy.
Búgin Astanada «Qazaqstan Respýblıkasynyń temekige qarsy baqylaý jónindegi zańnamasyn jetildirý» taqyrybynda ótken dóńgelek ústel barysynda QR ishki ister mınıstrliginiń ákimshilik polıtsııa komıtetiniń tóraǵasy Igor Lepeha osylaı málim etti.
Komıtet tóraǵasynyń sózine qaraǵanda, temekige áýes qazaqstandyqtar jyl saıyn temeki kompanııalaryna 72 mlrd. teńge tóleıdi eken. Bul degenińiz densaýlyq saqtaý salasy bıýdjetiniń 70 paıyzyna teń kórsetkish.
«Solaı bola tura, temekige qarsy zańnamanyń buzǵany úshin tólenetin aıyppul mólsheri tym az. 1 aılyq eseptik kórsetkishke teń somamen aıyppul salý týraly eshkimdi de qorqyta almaımyz. Sol sebepti biz aıyppul mólsherin ulǵaıtý týraly ereje engizbekpiz», - deıdi I. Lepeha.
Onyń aıtýynsha, ishki ister organdary qoǵamdyq uıym ókilderimen birlesip arnaıy belgilenbegen jerlerde temeki tartý faktilerin anyqtaý boıynsha 19 myńǵa jýyq reıd ótkizgen. Onyń barysynda belgili bolǵandaı, jedel-profılaktıkalyq sharalar boıynsha tek temeki tartýshylar ǵana jaýapkershilikke tartylyp, al buzýshylyqqa jol bergen laýazym ıeleri jazadan syrt qalǵan. Budan bólek, komıtet tóraǵasy quqyq qoldaný tájirıbesin de jetildirý qajettigin atap ótti.
