Tyıym salynǵan quralmen balyq aýlaǵandar 15 táýlikke qamalady

ASTANA. QazAqparat – Tyıym salynǵan quraldarmen balyq aýlaǵan jaǵdaıda salynatyn aıyppul kólemi ósedi jáne zańsyz áreket qaıtalanǵan jaǵdaıda aıyptyny qamaýǵa alý jaýapkershiligi qarastyrylyp jatyr. Bul týraly Ekologııa jáne tabıǵı resýrstar mınıstrligi balyq sharýashylyǵy komıteti tóraǵasynyń orynbasary Aıan Bahııanov aıtyp berdi, dep habarlaıdy QazAqparat tilshisi.

«Ákimshilik quqyq buzý kodeksine sáıkes, tyıym salynǵan quralmen balyq aýlaǵan jeke jáne zańdy tulǵalarǵa 20 AEK (aılyq eseptik kórsetkish) aıyppul kózdelgen. Búginde bizdiń mınıstrlik atalǵan kodeks baptaryna tıisti ózgerister engizip jatyr. Sonyń nátıjesinde aıyppul kólemin 50 AEK deıin arttyrý kózdelip otyr», - dedi Aıan Bahııanov ortalyq kommýnıkatsııalar qyzmeti alańynda ótken baspasóz máslıhatynda.

Onyń aıtýynsha, aıypty bir jyl ishinde zańsyz áreketin ekinshi ret qaıtalasa qamaýǵa alynady.

«Zań buzýshy bir jyldyń ishinde tyıym salynǵan quralmen balyq aýlaý faktisi boıynsha ekinshi ret ustalsa, ıaǵnı qaıtalasa, onda aıyptyny 15 táýlikke qamaý jazasy qarastyrylady», - deıdi Ekologııa mınıstrliginiń ókili.