Tyrnaq ósirip, gelmen boıaý zııan ba – sanıtar dáriger jaýaby
Gel jabyny neıl trendke aınalyp, birneshe jyldan beri qyz-kelinshekter arasynda úlken suranysqa ıe.
Manıkıýrdyń bul túri qalta kótererlik, eń bastysy – ádemiligin uzaqqa deıin saqtaıdy. Biraq, kópshilik onyń oń tustarynan basqa zııandy jaqtary baryn bile bermeıdi.
«Gel laktar ádettegiden góri tózimdi keledi jáne tyrnaq plastınasynda birneshe apta boıy synbaıtyndaı tyǵyz ornalasady. Gel jabyny kádimgi lak sııaqty aýada ózdiginen keppeıdi, ony mindetti túrde LED shamynyń astynda ustap, keptirý qajet. Geldi ketirýge 10-15 mınýtqa deıin ýaqyt jumsalady.
Al gel jaǵyp, keptirgennen keıin túzetýler engizý múmkin emes, ne sol kúıinde júrý kerek, ne bárin birden alyp tastaý qajet.
Artyqshylyǵy - jaǵymsyz ıisi joq, manıkıýrdiń úsh aptaǵa deıin saqtalýy, ádemi jyltyr túsiniń bolýy. Jalpy, gel jabyny akrılge qaraǵanda tózimdi jáne ıkemdi dep sanalady», - deıdi Soltústik Qazaqstan oblysy sanıtarııalyq-epıdemıologııalyq baqylaý departamentiniń kommýnaldyq obektilerdi baqylaý jáne qadaǵalaý bóliminiń jetekshi mamany Aıgúl Murtalımova.
Mamannyń aıtýynsha, gel tyrnaq plastınasyn álsiretýi múmkin. Uzaq ýaqyt manıkıýrdiń osy túrin paıdalanǵandyqtan tyrnaq juqaryp, sezimtaldyǵy artady.
«Tyrnaq orny men kýtıkýla — tyrnaqtyń eń mańyzdy aımaqtary. Birinshisi tyrnaq plastınasynyń qorektenýine jaýap beredi, al ekinshisi qorǵanys fýnktsııasyn oryndaıdy. Sondyqtan gel jabynyn sheship alarda múmkindiginshe muqııat bolý kerek. Geldi ketirý úshin salonǵa baryp, mamannyń kómegine júgingen jón. Ózdiginen julyp alý tyrnaq plastınasyn zaqymdaıdy, al ol tez qalpyna kelmeıdi, oǵan orta eseppen jarty jyl ýaqyt kerek», - deıdi Aıgúl Murtalımova.
Gel jabynyn jıi paıdalaný tyrnaqtyń qurylymyn buzady, ylǵaldy joıyp, keptirip jiberýi múmkin.
Sondyqtan gel lakty eki-úsh aıda bir ret, tyrnaqty «demaldyryp» qana paıdalanǵan jón.
«Geldik manıkıýr kezinde tyrnaqqa muqııat kútim qajet. Tyrnaq orny men kýtıkýlaǵa arnaıy maı men ylǵaldandyrǵyshty jaǵyńyz. Sondaı-aq, tyrnaqtardyń H2O tepe-teńdigin qalypqa keltiretin jáne olardy paıdaly qorektik zattarmen baıytatyn laktardy qoldaný paıdaly.
Al geldi keptirýge arnalǵan sham qaýipti me, joq pa? Bul jaıynda pikir burynnan ekige aıyrylǵan. Óıtkeni, ýltrakúlgin sáýleni qoldansa, bul qoldyń terisine ǵana emes, jalpy densaýlyqqa da keri áser etedi.
Alaıda, kóptegen brendter men keı sulýlyq salondary búginde olardan bas tartyp, jaryqdıodty LED shamdaryn qoldanatyn bolǵan. Sondyqtan qaýipsizdik úshin salonǵa barǵan kezde sheber iske kirispeı turyp, kórsetiletin qyzmet jáne qoldanylatyn jabdyq jaıynda egjeı-tegjeı surap, basyn ashyp alǵan durys», - deıdi sanıtar dáriger.
Mamannyń aıtýynsha, áıelder jaqsy kóretin gel-laktan keletin zııan bar. Sonyń ishinde tyrnaq sańyraýqulaǵy, melanoma paıda bolýy múmkin. Tyrnaq úzdiksiz boıalyp, aýa jetpegendikten osyndaı aýrýlarǵa ákelýi múmkin.
«Qyz-kelinshekter ádemi bolyp júrgisi keledi. Desek te jasandy dúnıeniń ekinshi qyry bar ekenin umytpaǵan jón. Sondaı-aq gel jabynyn 2-3 aptadan artyq ustaýǵa bolmaıdy. Biraq qyzdar bul erejeni bile tura eskermeıdi, densaýlyqtaryn qaterge tigedi. Al júkti áıelderge bul kezeńde tyrnaqty sándeýden bas tartýǵa keńes berer edim», - deıdi Aıgúl Murtalımova.
Gel jabyny 2-3 aptaǵa deıin ádemi saqtalýy úshin birneshe keńesti esten shyǵarmaǵan jón.
«Gel jabyny ystyq sýǵa tózimsiz. Manıkıýrdi uzaq ýaqyt ystyq sýda ustaý -odan qutylýdyń eń jaqsy joly. Ystyq vannada uzaq shomylý nemese manıkıýr jasatqannan keıin alǵashqy kúnderi saýnaǵa barý - jabynnyń bosaýyna ákelýi múmkin, sondyqtan ydys jýǵan kezde de qolǵap kııýdi umytpańyz.
Geldik lak tyrnaq plastınasyn buzbaýy úshin sheber ony manıkıýrge durys daıyndap, geldik lakty qoldaný men alyp tastaý tehnologııasyn saqtaýy qajet.
Úıdi hımııalyq zattarmen tazartyp jýǵan kezde rezeńke qolǵap kıińiz, óıtkeni bul ónimderdiń quramyndaǵy agressıvti komponentter tyrnaq jabyndysyna áser etýi múmkin. Bul ereje manıkıýrdi uzaq saqtaýǵa ǵana emes, sonymen qatar qol terisiniń tez qartaıýyna jol bermeıdi.
Geldik lak qoldanǵannan keıingi alǵashqy kúni uzaq sý protsedýralarynan, parafın terapııasynan aýlaq bolyńyz», - deıdi sanıtarııalyq-epıdemıologııalyq baqylaý departamentiniń jetekshi mamany Aıgúl Murtalımova.
Jalpy, qazirgi tańda qyz-kelinshekter arasynda qysqa tyrnaq sánde. Mamannyń aıtýynsha, bul durys ta. Qysqa tyrnaqty kútý ońaı, ári úıdiń kúndelikti sharýasyn istegende de yńǵaıly. Syndyryp alam ba dep qorqýdyń qajeti joq.