«Tynyshtyqqa tutqa bolar Elbasy usynystary talqylandy» - baspasózge sholý
***
Keshe Býrabaıda TMD-ǵa múshe elder Memleketter basshylary keńesiniń jáne Joǵary Eýrazııalyq ekonomıkalyq keńestiń kezekti otyrystary ótti. Qazaqstan Prezıdenti Nursultan Nazarbaevtyń tóraǵalyǵymen ótken TMD Memleketteri basshylarynyń basqosýynda lańkestik qaterlerge qarsy birlesken is-qımyldyń, qaýipsizdik pen quqyq tártipterin qamtamasyz etýdiń, Dostastyqqa múshe memleketterdiń kúshtik organdary yntymaqtastyǵynyń negizgi jaıttaryn qamtyǵan taqyryptar talqylandy. Al Qazaqstan, Reseı, Belarýs, Qyrǵyzstan jáne Armenııa prezıdentteriniń qatysýymen ótken Joǵary Eýrazııalyq ekonomıkalyq keńes otyrysynda áriptes memleketter arasyndaǵy yqpaldastyq úderisterin damytýǵa basa nazar aýdaryldy. Bul jaıynda «Egemen Qazaqstan» gazetiniń búgingi sanyndaǵy «Ortaq múddeler oraıyndaǵy basqosýlar» degen taqyryptaǵy maqalada egjeı-tegjeıli baıandalǵan. Basylymnyń jazýynsha, birinshi bas qosýda Memleket basshylary 17 qujatqa, al ekinshi alqaly jıynda 15 qujatqa qol qoıǵan. Bastapqy otyrys kezinde A.Lýkashenko Qazaqstan Prezıdentine Belarýstiń memlekettik nagradasy «Halyqtar dostyǵy» ordenin tapsyrǵan. «Nursultan Nazarbaev óziniń baı jumys tájirıbesin paıdalana otyryp TMD-nyń qalyptasýy men damýy úshin óte kóp jumys atqardy, eýrazııalyq yqpaldastyq ıdeıasy da oǵan tıesili. Osynyń bári halyqtar arasyndaǵy dostyqty nyǵaıtyp qana qoımaı, elderimizdegi adamdar turmysyn jaqsarta túsedi», - dedi Belarýs Prezıdenti.
«Májilistiń Ekonomıkalyq reforma jáne aımaqtyq damý komıtetiniń tóraǵasy Seıitsultan Áıimbetovtiń jetekshiligimen «Turǵyn úı qurylysyna úlestik qatysý týraly» zań jobasynyń ilespe túzetýlerimen tanystyrylymy ótkizildi. Ulttyq ekonomıka mınıstriniń orynbasary Qaıyrbek Óskenbaev depýtattardy zań jobasymen tanystyrdy», - dep jazady «Egemen Qazaqstan» gazeti senbilik sanyndaǵy «Úleskerler quqyn qorǵaıtyn qujat» degen taqyryptaǵy maqalasynda. Basylymnyń jazýynsha, ázirlengen jobaǵa sáıkes úlestik turǵyn úı qurylysyna qurylys salýshy, ýákiletti kompanııa, merdiger (bas merdiger), ekinshi deńgeıdegi bank, ınjınırıngtik kompanııa, ınjınırıngtik qyzmetter kórsetý boıynsha attestattalǵan sarapshylar, Kepildik berý qory, úlesker, ýákiletti organ, jergilikti atqarýshy organ sııaqty qatysýshylar kózdelgen. Úlestik turǵyn úı qurylysynyń kórsetilgen qatysýshylaryna árqaısynyń quqyqtary men mindetterin kózdeıtin mártebe jáne olarǵa tıisti talaptar berilgen.
***
«Aıqyn» gazetiniń jazýynsha, «Nur Otan» partııasy Qoǵamdyq saıasat ınstıtýtynyń qoldaýymen ótken «SarapTime» saraptamalyq tobynyń kezekti otyrysynda Memleket basshysy Nursultan Nazarbaevtyń BUU Bas Assambleıasynyń 70-sessııasynda kótergen bastamalary talqylandy. Basqosý barysynda «Nur Otan» partııasy Tóraǵasynyń birinshi orynbasarynyń keńesshisi Berik Ýálı Memleket basshysynyń asa mańyzdy 5 baǵytty qamtyǵanyna erekshe nazar aýdardy. Onyń sózinshe, N.Nazarbaevtyń BUU ekonomıkalyq jáne áleýmettik keńesin Jahandyq damý keńesine aınaldyrý týraly usynysy mezgil máselesi bolsa, ıadrolyq qarýdan azat álemge qol jetkizý jónindegi jalpyǵa ortaq deklaratsııa qabyldaý týraly bastamasy tynyshtyqqa tutqa bolar batyl baılam. Osy otyrysta halyqaralyq Túrik akademııasynyń sarapshysy, saıasattanýshy Tımýr Kozyrev te pikir bildirgen. Ol: «Elbasy BUU-nyń shtab-páterin Azııaǵa kóshirý týraly óte oryndy usynys usyndy. Qazirgi Azııa-Tynyq muhıty elderindegi damýdy eskere otyryp, beıbitshil múdde-maqsattardy sol jerlerge shoǵyrlandyrý arqyly jalpy órkenıettiń damýyna yqpal etetin múmkindikter bar ekeni aıtylǵan bul usynys qoldaýdy qajet etedi. Búginde bul usynysty búkil álem talqylap jatyr», - deıdi. Maqala basylymnyń senbilik sanynda «Tynyshtyqqa tutqa bolar Elbasy usynystary talqylandy» degen taqyryppen berilgen.
Osy basylymnyń jazýynsha, Aqtóbe rels-arqalyǵy zaýyty (ARAZ) otandyq rels ónimderi prokatyn shyǵardy. Bul biregeı kásiporyn memleket basshysynyń jeke tapsyrmasy boıynsha salynǵan TMD aýmaǵynda teńdesi joq zaýyt. ARAZ-dyń jobalyq qýaty jylyna 430 myń tonna metall ónimderin shyǵarýǵa jetedi. Onyń basty ónimi termoqysymǵa shydamdy R-65 markaly uzyndyǵy 120 metrge jetetin joǵary jyldamdyqty magıstralǵa arnalǵan relster shyǵarady. Oǵan qosa, jylyna 230 myń tonna rels arqaýlary, buryshtamalar, shvellerler shyǵarady. Bul temir jol ónimderi Qazaqstandy ǵana emes, kórshiles memleketterdiń de suranysyn qanaǵattandyrady. Maqala taqyryby: «Alǵashqy otandyq rels ónimi shyǵaryldy».
***
«AQSh-ta tanystarynyń úıinde turyp jatqan Batyrhan Shúkenovtiń uly men birinshi áıeli kóshede qaldy», - dep jazady «Ekspres-K» gazeti. Bul jaıynda basylymǵa reseılik shoýmen Otar Kýshanashvılı málim etken. Onyń sózine qaraǵanda Batyrhan Shúkenovtiń Maqsat esimdi 13 jastaǵy uly men Katı esimdi birinshi áıeli bar. Olar búginde AQSh-ta dalaǵa qalýǵa májbúr. Óıtkeni, olardyń muhıttyń ar jaǵynda emin-erkin ómir súrýine B.Shúkenov barlyq jaǵdaı jasap kelgen. Tipti, úı de salyp bergen eken.
