Tynyshtyqbek Ábdikákimuly: Bárimiz bir úıdiń balasyndaı tártipke baǵynýymyz kerek
SEMEI. QazAqparat – Aqyn, ádebıetshi Tynyshtyqbek Ábdikákimuly Prezıdent Qasym-Jomart Toqaevtyń elimizdegi tótenshe jaǵdaıǵa jáne memlekettiń daǵdarysqa qarsy is-sharalaryna baılanysty málimdemesine oraı pikir bildirdi, dep habarlaıdy QazAqparat.
«Memleket basshysy óz sózinde koronavırýsqa qatysty atqarylyp jatqan jumystardy egjeı-tegjeıli aıtyp berdi. Prezıdenttiń bastamalaryn qoldaımyz. Azyq-túlikti tegin alatyn azamattardyń qatary kóbeıetini, dárigerlerge qoldaý kórsetiletini áste durys. Taýar baǵasynyń qymbattamaýyn baqylaýǵa alý da kún tártibindegi másele. Osy oraıda kásipkerler jeke paıdany ǵana oılap, adamgershilikten attamaǵany abzal», - deıdi aqyn.
Onyń aıtýynsha, halyq arasynda tótenshe jaǵdaı rejımin buzyp jatqandar birinshi kezekte óz jaqyndarynyń densaýlyǵyn oılaýlary tıis.
«Bul da bir qıynshylyq, ýaqytsha synaq. Osyndaı sátterde aýyzbirshilik tanytqanymyz jón. Bárimiz bir úıdiń balasyndaı tártipke baǵynýymyz kerek. Sonda ǵana jer-jahandy jalmaǵan juqpaly indetti jeńe alamyz», - deıdi Tynyshtyqbek Ábdikákimuly.
Óz sózinde ol Shyǵys Qazaqstan oblysynda koronavırýstyń taralýyna tosqaýyl qoıý maqsatynda atqarylyp jatqan jumystarǵa oń baǵasyn berdi.
«Tótenshe jaǵdaı kezinde óńirimizde jańa shekteýler engizilip jatyr. Bul halyqtyń beı-bereket júrip-turýyn tyıý úshin qolǵa alynǵan shara. Endi barsha jerlesterimdi úıde otyrýǵa, sol shekteýlerdi qatań saqtaýǵa shaqyramyn», - deıdi ádebıetshi.
Aıta keteıik, keshe Prezıdent Qasym-Jomart Toqaev respýblıkalyq telearnalar efırinen málimdeme jasaǵan bolatyn.Foto: madeniportal.kz
