Tyńaıtqyshtardy sýbsıdııalaýǵa ákimdikter bóletin qarajat jetkilisiz – AShM
«Ótken jyly sýbsıdııa normasyn paıyzdyq mánde belgileýden teńgemen belgiletin absolıýttik normatıvke kóshirý bóliginde mıneraldy tynaıtqyshtardy sýbsıdııalaý tetigi ózgertildi. Nátıjesinde 2017 jyly mıneraldy tynaıtqyshtardy qoldaný kólemi 368,4 myń tonnany qurady, bul 2016 jyldyń deńgeıinen 107,5 myń tonnaǵa nemese 41 paıyzǵa joǵary. Osy rette, mıneraldy tyńaıtqyshtardy qoldaný tómen deńgeıde qalýda jáne qajettiliktiń 14 paıyzynan aspaıdy»,- dedi birinshi vıtse-mınıstr.
Onyń aıtýynsha, 2018 jylǵa aýyl sharýashylyǵy taýaryn óndirýshiler 446 myń tonna tyńaıtqyshqa, onyń ishinde naýryz-mamyr aılaryndaǵy kóktemgi dala jumystaryn júrgizý kezeńinde 270,1 myń tonna tyńaıtqyshqa ótinim bergen. Onyń ishinde negizgi úles «Qazfosfat» jáne «QazAzot» jaýapkershiligi shekteýli seriktestikteriniń otandyq óndiris tyńaıtqyshtaryna tıesili.
«2018 jylǵa tyńaıtqyshtardy sýbsıdııalaýǵa jergilikti bıýdjetterde 17 mlrd teńge kózdelgen, bul ótinim berilgen tyńaıtqysh kólemin qamtamasyz etý úshin jetkiliksiz. Osyǵan baılanysty oblys ákimdikterine tyńaıtqyshtardy sýbsıdııalaýǵa arnalǵan bıýdjet qarajaty kólemin ulǵaıtýdy usynamyz», - dedi Arman Evnıev.
Jalpy onyń deregine sáıkes, 2018 jylǵy 1 qańtardaǵy jaǵdaı boıynsha elimizde 142,6 myń traktor, ónimdiligi joǵary 3,7 myń egis kesheni, 82,5 myń tuqym sepkish, 297 myń topyraq óńdeý quraly bar. 1 naýryzdaǵy jaǵdaı boıynsha aǵymdaǵy jyldyń kóktemgi dala jumystaryn júrgizýge traktorlardyń daıyndyǵy 87, egis keshenderiniń daıyndyǵy 100, tuqym sepkishterdiń daıyndyǵy 87, topyraq óńdeý quraldarynyń daıyndyǵy 88 paıyzdy quraıdy.