Tyńaıtqyshtardy satyp alýda joǵary kórsetkishter úsh oblysta baıqaldy
NUR-SULTAN. QazAqparat – Aýyl sharýashylyǵy eńbekkerlerine 400 myń tonnadan astam mıneraldy tyńaıtqysh jetkizildi. Bul týraly Úkimet otyrysynda Aýyl sharýashylyǵy mınıstri Saparhan Omarov málim etti, dep habarlaıdy QazAqparat tilshisi.
«Ónimdilikti arttyrýdyń mańyzdy faktory tyńaıtqyshtardy jetkilikti mólsherde qoldaný bolyp otyr. Tyńaıtqyshtardy qoldaný kólemin ulǵaıtý úshin aǵymdaǵy jyly 30,9 mlrd teńge bólindi, bul tyńaıtqyshtardy engizý kólemin ǵylymı qajettiliktiń 25%-yna deıin jetkizýge múmkindik beredi. 4 maýsymdaǵy jaı-kúı boıynsha aýyl sharýashylyǵy eńbekkerlerine 405,3 myń tonna mıneraldy tyńaıtqysh jetkizildi (jospardyń 63%-y), budan basqa saqtaý qoımalarynda taǵy 29,4 myń tonna bar. Bul rette tıep-jóneltý jumystarynyń jalǵasyp jatqanyn jáne belgili kólemderdiń kúzgi óńdeý kezinde engiziletinin atap ótken jón», - dedi S. Omarov.
Onyń aıtýynsha, tyńaıtqyshtardy satyp alýda joǵary kórsetkishter Qostanaı, Qyzylorda jáne Soltústik Qazaqstan oblystarynda baıqaldy. Shyǵys Qazaqstan oblysynda tıep-jóneltý tolyǵymen aıaqtaldy.
«Qalǵan óńirler tyńaıtqyshtardy qoldaný kólemin josparlanǵan kórsetkishterge deıin ulǵaıtýy qajet. 2023 jylǵa deıin ákimdikter men aýyl sharýashylyǵy eńbekkerleriniń ótinishteri boıynsha tyńaıtqyshtardy qoldaný kóleminiń tómendeýine jol bermeý maqsatynda Aýyl sharýashylyǵy mınıstrligi sýbsıdııa alý úshin agrohımııalyq kartogrammalar berý talabyn ýaqytsha toqtatty», - dedi mınıstr.
Budan buryn habarlanǵandaı, búgin Úkimet otyrysynda Premer-Mınıstr Asqar Mamın aýyl sharýashylyǵy salasyna qatysty birqatar tapsyrma berdi.
