Tyńaıtqysh baǵasyn arzandatýǵa respýblıkalyq bıýjetten qosymsha qarjy qaralady

NUR-SULTAN. QazAqparat – QR Premer-Mınıstri Álıhan Smaıylov Májilis ókilderiniń depýtattyq saýalyna joldaǵan jaýabynda dıqandar úshin tyńaıtqysh baǵasyn arzandatýǵa respýblıkalyq bıýjetten qosymsha qarjy bólý máselesi qarastyrylyp jatqanyn málim etti, dep habarlaıdy QazAqparat tilshisi.

«Mıneraldy tyńaıtqyshtardy sýbsıdııalaýdy sheshý boıynsha 2021 jyly mıneraldy tyńaıtqyshtardyń álemdik baǵasy tabıǵı gaz ben elektr qýatynyń qymbattaýyna baılanysty aıtarlyqtaı ósti. Qalyptasqan jaǵdaıdy eskere otyryp, aýyl sharýashylyǵy taýaryn óndirýshilerdi qarjylyq qoldaý maqsatynda tyńaıtqyshtardy sýbsıdııalaý normalary aǵymdaǵy naryqtyq baǵany eskere otyryp, qaıta qaraldy. Búgingi tańda oblys ákimdikteri normalardy qaýlymen bekitý rásimin qolǵa alǵan» dep jazylǵan jaýapta.

Aıtýynsha, qazir Aýyl sharýashylyǵy mınıstrligi Indýstrııa jáne ınfraqurylymdyq damý mınıstrligimen jáne oblys ákimdikterimen birlese otyryp, mıneraldy tyńaıtqyshtardyń baǵasyn tómendetý jumysyn júrgizip jatyr.

«Aıtalyq, otandyq taýar óndirýshilermen birqatar kezdesýler men keńester ótkizilip, nátıjesinde aýyl sharýashylyǵy taýaryn óndirýshilerdi qoljetimdi baǵadaǵy mıneraldy tyńaıtqyshtarmen qamtamasyz etý týraly kelisimge qol jetkizildi. Aýyl sharýashylyǵy taýaryn óndirýshilerdiń málimdelgen kólemi naqty jetkizý kestelerin qalyptastyrý úshin otandyq zaýyttarǵa jiberildi. Sondaı-aq, «QazAzot» AQ-men ótkizilgen keńestiń qorytyndysy boıynsha ammıak selıtrasynyń baǵasyn jyl basyndaǵy belgilengen baǵadan 25 %-ǵa (tonnasyna 200,0 myń teńgeden 160,0 myń teńgege deıin) tómendetý jóninde kelisimge qol jetkizildi. Óńirlerdiń arzandatylǵan tyńaıtqyshqa qajettiligin qamtamasyz etý úshin jergilikti bıýdjette 26,8 mlrd teńge kózdelgen. Sonymen qatar, qazirgi ýaqytta respýblıkalyq bıýdjetten qosymsha qarajat bólý máselesi qarastyrylýda», - dedi Álıhan Smaıylov.

Tıisti bıýdjettik ótinim qaralyp, respýblıkalyq bıýdjet komıssııasynyń qaraýyna Qarjy mınıstrligine engizilgen.

«Jalpy, kóktemgi dala jumystarynyń bastalýymen óńirlerdiń mıneraldy tyńaıtqyshtarmen qamtamasyz etilýine monıtorıng júrgizilýde. 25 naýryzdaǵy jaǵdaı boıynsha 265,4 myń tonna tyńaıtqysh jetkizýge kelisimshart jasalyp, onyń 116,4 myń tonnasy tıelip-jóneltildi. Tyńaıtqysh satýshylar qoımalardy toltyrýda, tyńaıtqysh jetkizý uıymdastyrylǵan. Keı óńirlerde oblys ákimdikteri otandyq zaýyttarmen memorandýmǵa qol qoıyp, jetkizilim kólemin bekitti», - delingen Premer-Mınıstrdiń jaýabynda.

Eske salsaq, osydan bir aı buryn QR Aýyl sharýashylyǵy mınıstri Erbol Qarashókeev Úkimet otyrysynda ammıak selıtrasynyń baǵasy arzandaǵanyn baıandaǵan.