Tyl qyzmetkerleriniń komandırlik daıyndyǵy pysyqtaldy - QR Qorǵanys mınıstrligi
Jıyn jumysyn Qurlyq áskerleri bas qolbasshysynyń tyl jónindegi orynbasary general-maıor Qajyǵalı Muqatov basqardy.
«Jıynnyń maqsaty - komandırlik daıyndyqty oqytýdyń negizgi pánderi boıynsha bilim jetildirý, ofıtserlerdiń kásibı daıyndyq deńgeıin tekserý jáne komandırlik daıyndyqtyń sapasyn arttyrý jóninde usynystar daıyndaý»,-delingen QR QM baspasóz qyzmetiniń málimetinde.
Jıyn barysynda jedel-taktıkalyq daıyndyq, taktıka-tyldyq daıyndyq, jaýyngerlik qamtamasyz etý túrleri boıynsha jáne áskerlerdiń kúndelikti qyzmetin basqarý jóninde sabaqtar ótkizildi.
Tyldyq qamtamasyz etýdiń damý perspektıvasy men Qazaqstan Qarýly Kúshterin materıaldyq-tehnıkalyq qamtamasyz etýdiń biregeı júıesin jasaý týraly sabaqty QR QK Tyl bastyǵynyń orynbasary polkovnık Almaz Ahmadıev ótkizdi. Sondaı-aq, Ulttyq áskerı ýnıversıtetiniń muǵalimderi de dáris oqydy.
Jıynǵa qatysýshylar urystaǵy áskerlerdi tyldyq qamtamasyz etý negizderin zerttep, jaýyngerlik is-qımyldardy jan-jaqty qamtamasyz etý máselelerine, ásirese arnaıy operatsııalar men eldi mekenderdegi urys qımyldary kezinde áskerlerdi tyldyq qamtamasyz etý máselelerine basa nazar aýdardy. Dáris kezinde alynǵan bilimder semınarlar, toptyq jattyǵýlar men tájirıbelik sabaqtar kezinde naqty pysyqtaldy.
Ulttyq áskerı ýnıversıtetiniń sport kesheninde ofıtserler dene daıyndyǵy boıynsha synaqtar tapsyrdy.