«Tyǵylmaq» pen «Asan» fılmderi Kann kınofestıvaline jol tartty
ASTANA. QazAqparat - Sh.Aımanov atyndaǵy «Qazaqfılm» kınostýdııasy túsirgen qysqametrajdy fılmder mamyrdyń 8-19 aralyǵynda Frantsııada ótetin Halyqaralyq Kann kınofestıvaliniń Short Film Corner baǵdarlamasy aıasynda kórsetiletin boldy, dep habarlaıdy QazAqparat tilshisi kınostýdııanyń baspasóz qyzmetine silteme jasap.
Álemdik qysqametrajdy fılmderge arnalǵan Kann festıvaliniń kásibı bólimi - Short Film Corner baǵdarlamasy aıasynda otandyq eki kınotýyndy - «Tyǵylmaq» jáne «Asan» atty fılmder kórsetiledi.
«Atalǵan baǵdarlamanyń basty maqsaty - kıno álemindegi kásibı kınogerlerdiń basyn qosyp, jas rejısserler men prodıýserler, sondaı-aq álemniń túkpir-túkpirinen jınalǵan dıstrıbıýtorlar arasynda baılanys ornatý. Osy baǵdarlama aıasynda kórsetilgen fılmder halyqaralyq kınofestıvalderge joldama alyp, halyqaralyq seriktester jáne dıstrıbıýtor tabýǵa múmkindikteri bar», - dep habarlaıdy kınostýdııanyń baspasóz qyzmetinen.
Bıyl Short Film Corner baǵdarlamasyna qatysýǵa álemniń birqatar elderiniń rejısserlerinen 2 myńnan astam tapsyrys kelip túsken. Jyl saıyn ulǵaıatyn bul kórsetkish qysqametrajdy fılmderge degen qyzyǵýshylyqtyń artyp kele jatqanyn kórsetedi.
Aıta ketsek, «Tyǵylmaq» jáne «Asan» fılmderi byltyr «Qazaqfılm» kınostýdııasyndaǵy «Debıýt» shyǵarmashylyq-óndiristik birlestigi uıymdastyrǵan stsenarııler konkýrsynda jeńiske jetip, óndiriske jiberilgen bolatyn.
«Rejısser Venera Qaıyrjanova túsirgen «Tyǵylmaq» fılmi eresekter problemasyna kýá bolǵan eki kishkentaı qyz týraly baıandaıdy. Olar sol jaǵdaıdan qashyp, óz balalar álemine jasyrynamyz dep, kóshede «tyǵylmaq» oınaıdy. Bul týyndy Sankt-Peterbor qalasynda ótken dybys rejısserlerine arnalǵan «Intonnatsııa» V halyqaralyq kınofestıvalinde Grıgorıı Frank atyndaǵy arnaıy júldemen marapattaldy (fılmniń dybys rejısseri Qoıshyn Qanaı). Al rejısser Berik Jahanovtyń «Asan» fılminde kóp jyldary ákesin kórmese de, ony aqtyq saparǵa shyǵaryp salýǵa barǵan jigittiń ómiri sýretteledi», - delingen habarlamada.
