Tıantszınde Qazaqstan bıznesiniń jańa ókildigi ashyldy
ASTANA. KAZINFORM – Tıantszındegi Halyqaralyq saýda jáne keme qatynasy servıs ortalyǵynda 100 sharshy metrlik Kazakhstan Hall keńsesi ashyldy. Munda azyq-túlik ónimderi basty orynǵa shyǵarylyp, keńse Qazaqstan bıznesiniń Qytaıdaǵy resmı ókildigine aınalmaq.
Saýda jáne ıntegratsııa mınıstrliginiń málimetinshe, keńse 2025 jylǵy maýsymda Astanada QazExportPromotion qory men Qytaıdyń Silvery Dragon Group Technology and TradeCo., Ltd. kompanııasy arasynda qol qoıylǵan memorandým nátıjesinde ashylǵan.
– Búginde Kazakhstan Hall ázirge pılottyq formatta jumys istep tur. Qazirgi ýaqytta kórme zaly jańa taýarlarmen tolyqtyrylyp, QazTrade ókildigi mártebesin alý úshin qujattar rásimdelip jatyr. Resmı ashylý saltanaty osy jyldyń kúzine josparlanǵan, - delingen mınıstrlik habarlamasynda.
QazTrade, saýda saıasatyn damytý ortalyǵynyń málimetinshe, Qazaqstan men Tıantszın arasyndaǵy taýar aınalymy turaqty ósim kórsetip keledi. 2023 jyly ol $347,9 mln qurasa, 2024 jyly $474 mln-ǵa deıin ulǵaıdy.
Tıantszın – Shanhaı yntymaqtastyq uıymynyń basty saýda haby. Qala port arqyly júk tasymaldaý men logıstıkalyq qyzmet usynady. Qazaqstan bul jobaǵa qosylý arqyly ShYU elderi úshin arnaıy «jasyl dálizdi» paıdalaný, Azııa men Eýropany baılanystyratyn mýltımodaldy baǵyttarǵa shyǵý múmkindigine ıe boldy.
– Tıantszındegi QazTrade keńsesiniń ashylýy – biz úshin úlken jańalyq. Tıantszın porty arqyly álemniń kez kelgen eline taýar jetkizý ońaı, ári jyldam bolmaq. Sonymen qatar ókildigimiz arqyly Qytaı naryǵynda tsıfrlyq saýdany damytýǵa jáne ınvestıtsııa tartýdy josparlap otyrmyz, - dedi QazTrade saýda saıasatyn damytý ortalyǵynyń bas dırektory Aıtmuhammed Aldajarov.
Buǵan deıin Dımash Qudaıbergen Qytaı telearnasymen birlesken mýzykalyq jobasyn Qazaqstanda túsiretinin jazǵan edik.