Tıantszın sammıti barysynda ShYU-nyń 2035 jylǵa deıingi damý strategııasy qabyldanady
ASTANA. KAZINFORM — Qytaıda ótken Shanhaı yntymaqtastyq uıymyna (ShYU) múshe-memleketter basshylary keńesiniń 25-shi otyrysynyń qorytyndysy boıynsha birqatar qujatqa qol qoıylady dep kútilip otyr. Bul týraly búgin Beıjińde ótken brıfıngte QHR Syrtqy ister mınıstriniń kómekshisi Lıý Bın málimdedi, dep habarlaıdy Kazinform menshikti tilshisi.
Onyń aıtýynsha, Qytaıdaǵy Shanhaı yntymaqtastyq uıymy sammıtiniń qorytyndysy boıynsha ShYU-nyń 2035 jylǵa deıingi damý strategııasyna jáne basqa da birqatar qujatqa qol qoıylady.
Shanhaı yntymaqtastyq uıymynyń sammıti aıasynda Tıantszın qalasynda ShYU-ǵa múshe memleketter basshylary keńesiniń 25-shi otyrysy jáne «ShYU+» formatyndaǵy otyrys ótedi.
QHR SІM taratqan málimdemede atap ótilgendeı, QHR tóraǵasy Sı Tszınpın ShYU sammıtine qatysýshy elder kóshbasshylaryn qarsy alý banketin uıymdastyryp, birqatar ekijaqty kezdesýler ótkizedi.
ShYU sammıti 31 tamyz ben 1 qyrkúıek aralyǵynda Qytaıdyń Tıantszın qalasynda ótedi. Eske sala ketsek, Uıymnyń 2024 jyldyń shildesinde Astanada ótken sammıtinen keıin Qytaı resmı túrde ShYU-ǵa 2024-2025 jyldary tóraǵalyq etti.
ShYU — 2001 jyly qurylǵan halyqaralyq uıym. Onyń quramyna 10 múshe memleket, 2 baqylaýshy el jáne ShYU dıalogy boıynsha 14 seriktes memleket kiredi.
Aıta ketelik Beıjińde ShYU-ǵa múshe memleketter syrtqy ister mınıstrlikteriniń ókilderi bas qosqan edi.