Tıan-Shan taýynyń bir shyńyna «Aktıýbınskıı vestnık» gazetiniń ataýy berildi
AQTÓBE. QazAqparat -Aqtóbelik alpınıster «Aktıýbınskıı vestnık» gazetiniń usynysymen jańa shyńdy baǵyndyrdy. Tıan-Shan taýynyń 3353 metrlik shyńy gazet atymen ataldy, dep habarlaıdy QazAqparat tilshisi.
«Aktıýbınskıı vestnık» gazetine 100 jyl tolýyna oraı alpınıster men basylym ujymy tarıhı kelisim jasady. Aqtóbelik alpınıster Ońtústik Qazaqstanǵa attanyp, shyńdy baǵyndyrýǵa 12 saǵatty jumsady. Tókken ter men qajyrly eńbek zaıa ketpeı, aqtóbelikter jańa shyńdy baǵyndyryp, qoltańba qaldyrdy.
«Óńirimizdiń basty basylymynan usynys túsken kezde birden qabyldap, jańa shyńdy baǵyndyrýǵa shyqtyq. Shyńǵa shyǵý óte qıyn boldy, biraq biz mejeni baǵyndyrdyq. Aldaǵy ýaqytta kez kelgen adam bul shyńǵa shyǵyp, arnaıy belgimen tanysýǵa bolady»,- dedi alpınıst Anýar Hamıtov.
Aıta keteıik, «Aktıýbınskıı vestnık» gazetiniń alǵashqy nómiri 1918 jyly 19 maýsymda jaryqqa shyqty. Gazettiń arnaıy entsıklopedııasy daıyndalyp jatyr. Áli gazettiń barlyq nómiri tsıfrlandyrylady.
«Aktıýbınskıı vestnık» shyńy Tıan-Shan taýlarynda teńiz deńgeıinen 3353 m bıiktikte ornalasqan. Aldaǵy ýaqytta tarıhy baı basylymnyń ár nómirin qaıta qalpyna keltirip, tsıfrlandyrýdy, ıaǵnı, elektrondy nusqasyn jasaýdy josparlap otyrmyz. Zertteýshiler úshin gazette qundy materıaldar tabylady dep senemiz», - dedi gazettiń bas redaktory Aıgúl Nurkeeva.
Sonymen qatar, «Aktıýbınskıı vestnıktiń» 100 sáti» fotokórmesi ashylady. Gazet 50 jyldyǵynda «Qurmet belgisi» ordenimen, 95 jyldyǵynda Elbasy Nursultan Nazarbaevtyń Alǵys hatymen marapattalǵan bolatyn.
