Tıan-Shan qońyr aıýy jazda nemen qorektenedi
ASTANA. KAZINFORM – Jaz mezgilinde Tıan-Shan qońyr aıýy belsendi tirshilik etip, qysqy uıqyǵa qajetti maı qoryn jınaıdy, dep habarlaıdy Ekologııa jáne tabıǵı resýrstar mınıstrligi.
Mınıstrliktiń málimetinshe, jaz – aıý úshin qys boıy joǵaltqan kúsh-qýatyn qalpyna keltirip, mol qorek jınaıtyn eń mańyzdy kezeńderdiń biri.
– Jaz mezgilinde Tıan-Shan qońyr aıýy belsendi tirshilik etedi. Bul kezeńde ol qys boıy jumsaǵan kúsh-qýatyn qalpyna keltirip, aldaǵy qysqy uıqyǵa qajetti maı qoryn jınaı bastaıdy. Aıý kóbine tańerteń erte jáne keshki salqyn ýaqytta qorek izdeıdi, – delingen habarlamada.
Jazda Tıan-Shan qońyr aıýy negizinen ózen-kólderdiń mańynda, qalyń ormandar men alpilik shalǵyndarda mekendeıdi. Al kún ystyq bolǵan kezde kóleńkeli jerlerde nemese bulaqtar men ózenderdiń jaǵasynda demalady.
– Tıan-Shan qońyr aıýy tabıǵattaǵy tuqymdardyń taralýyna, sonyń ishinde jabaıy alma aǵashy – Sıvers almasynyń tuqymdarynyń tabıǵı jolmen kóbeıýine zor úles qosady. Sondyqtan bul janýardy jáne onyń tabıǵı meken etý ortasyn saqtaý ekojúıe úshin asa mańyzdy, – dep málimdedi mınıstrlik.
Aıta keteıik, Kólsaıda aıý qonjyǵymen birge kameraǵa túsip qaldy.
