Tıan-Shan qońyr aıýy «Saıram-Ógem» memlekettik ulttyq tabıǵı parkiniń fototuzaǵyna túsip qaldy
ASTANA. KAZINFORM — Sırek kezdesetin aıýdyń bul túri sáýir aıynyń sońynda park aýmaǵynda arnaıy ornatylǵan fototuzaqqa ilikken.
Orman sharýashylyǵy jáne janýarlar dúnıesi komıtetiniń málimetinshe, Tıan-Shan qońyr aıýy Qazaqstannyń Qyzyl kitabyna engizilgen. Sońǵy jyldary ulttyq park aýmaǵynda aıýlardyń sany jyl saıyn artyp keledi.
— Alaıda, bul janýar túri jyrtqysh janýarlar sanatyna jatatyndyǵyn eskergen jón. Sol sebepti, ulttyq park qyzmetkerleri kelýshilerge aıýlarmen kezdesken kezde qaýipsizdik sharalaryn saqtaý jáne janýarlardy alańdatatyn kez kelgen áreketten aýlaq bolý mańyzdy ekenin eskertedi, — dep eskertti komıtetten.
Eske sala keteıik, buǵan deıin «Kólsaı kólderi» memlekettik ulttyq tabıǵı parki aýmaǵynda jabaıy janýarlardy baqylaý maqsatynda ornatylǵan beınetuzaqtardyń birine QR Qyzyl kitabyna engizilgen qar barysy túsken bolatyn.